Pep leh a naute tan insiamṭhat hun
Manchester City-in Champions League-a an match hmasa berah Lyon chu 2-1 in an hneh lo a, European champion nih duh avanga Pep Guardiola laluttu club tan result duhawm a ni lo.
Hetihrual hian City hian chhuanlam tur an nei–hrem vangin Pep hian bench aṭangin a naute a ṭawiawm thei lo a, mipui zing aṭangin inkhel hi a en. City hian zanin dar 10:25-ah Hoffenheim an lenchilh dawn a, chhuanlam siam a thiang tawh lo.
Lyon hnuah match thum khel leh tawhin Pep-a'n a ho leh thei tawh a, mual sir aṭanga anmahni autu tur coach a awm chuan team dang daih an ni tih an pholang nghal.
Cardiff City, Oxford United leh Brighton & Hove Albion an hneh vek a, hetih chhunga an goal khung zat chu goal 10 niin an lamah goal a lut miah lo!
Group F inkhel dangah hmahruaitu Lyon chu zanin dar 12:30-ah an inlan ve dawn bawk a, Shakhtar Donetsk an mikhual ang.
Hmabak hautak
City hian match hmasa berah khan Lyon hneh se chuan an hmabak hi 'hautak' tia sawi a rem kher lo ang. Mahse, an chak lo miau a, Hoffenheim lakah an tlawm leh a nih chuan last 16 lut turin an dinhmun a derthawng nghal ang.
Hei tak hi City dinhmun derthawnna chu a ni ta – German club an hmachhawn zawhah Liverpool an hmachhawn lehnghal a ngai dawn a, an hmabak a hautak a, an chau dawn tih a chiang.
Pep erawhin Liverpool a la ngaihtuah duh lo. Spanish manager chuan, "Tuna pawimawh ber chu Hoffenheim a ni a, chumi zawhah chuan Liverpool hmachhawn turin kan inbuatsaih leh ang," a ti a, lungngai lawk duh lo.
City ṭantute tana thu hriat nuam tur chu Hoffenheim-in beisei an phak bik lo. Champions League-a an match hmasa berah Shakhtar chu 2-2 in an inhnehtawkpui a, an league match hnuhnung berah RB Leipzig chu 2-1 in an ngam lo bawk.
Aw...Nagelsmann!
Hoffenheim chanchin sawi chuan Julian Nagelsmann hming lam rik a ngai leh ṭhin–kum 31 mi manager-in a team tana a hnathawh hi fak tlak a ni a, a kum zat ngaihtuah phei chuan fak a phu lehzual.
Season thar aṭanga RB Leipzig enkawl tur boss hian a ngaihsan Pep-a enkawl team a tawng dawn a, Spanish manager khelh dan tur hriatthiam harsa viau mah se English club dan chah dan tur a hriat thu a sawi.
Nipui laia Real Madrid sawmna a hnar thu sawitu coach chuan, "Pep hian a team hmachhawn a zirin khelh dan a nei a, a game ruahman dan hi hriatthiam a harsa ṭhin hle. Mahse, ngaihtuahna tam tak ka seng tawh a ni," tiin Spanish manager ropui hmaah a zam lo.
Pep hian Bayern Munich enkawl ṭhin mah se a season tawp berna laihawlah Nagelsmann hian Hoffen-heim a enkawl ve chauh a, manager pahnih hi an la intawng ngai lo.
Player inlan tur
City tan inlan thei lo chiang sa chu Kevin de Bruyne, Claudio Bravo leh Eliaquim Mangala te an ni a, Benjamin Mendy dinhmun a la chiang lo fo bawk. Pep chuan, "A dam hunah a lo kir mai ang," a ti! Hun a la duh deuh dawn niin a lang.
Manchester khaw club tan inhliam dang sawi tur an awm lo a, Hoffenheim tan hei hi thu hriat nuam lo tak a ni ngei ang. Tlarhmaah Sergio Aguero chu innghahna tur a ni lehin a rinawm a, Raheem Sterling leh Germany hrechiangtu Leroy Sane chu inlan tura beisei an ni bawk.
German club tan damdawi In a lun mah mah thung a, an ṭhat dan berin English champion an mikhual thei dawn lo. Bundesliga-a an match hnuhnung berah captain Kevin Vogt, defender Ermin Bicakcic leh defensive midfielder Havard Nordtveit te an chhawr thei lo vek.
Player pawimawh pathum hi an inlan thei dawn lo a nih chuan tawnhriat nei tlem rual Stefan Posch (21), Kevin Akpoguma (23) leh Justin Hoogma(20) te an inlan a ṭul dawn tihna a ni a, a pawi thui thei ang.