Bale a inlan thei dawn lo

Real Madrid chuan zanin dar 12:30-ah Champions League group stage match khel turin CSKA Moscow an lenchilh dawn a, hliam vangin Gareth Bale chu a inlan thei dawn lo.

Season thum chhung a zawna European champion ni tawh Real hian an match hnuhnung berah Atletico Madrid chu goal khung loin an inhnehtawkpui a, he inkhelah hian Bale chu second half khelhtir a ni lo.

Inkhelh zawhah Real coach Julen Lopetegui chuan, "A mal tihrawlah hliam tenau a nei a, inventhawnna avangin kan luhtir ta lo a ni," tiin sawi mah se Bale hi an rin aiin a hliam na niin a lang.

Hetihlai hian Sergio Ramos chu squad-ah hian telh a ni lo bawk. Real captain pawh hi Atletico nena an inkhel ṭantir lamah Saul Niguez nen an intauh palh a, minute 90 khelh chhunzawm mah se Lopetegui-a'n Russia-a hruai aiin chawlh hahdamtir a thlang ta zawk a ni.

Real hian Atletico an inhnehtawkpui hmain Sevilla chu 3-0 in an ngam lo bawk a, team boruak a ṭha lo. Champions League bikah erawh an match hmasa berah AS Roma chu 3-0 in an sawp tawh a, Italian club hian zanin dar 12:30-ah vek Viktoria Plzen an mikhual ve thung ang.