Rooney-a'n goal hnih a khung

USA lamah Wayne Rooney-a'n a la tar lo tih a pholan chhunzawm zel a, 5-0 a Montreal Impact an hnehna inkhelah goal hnih a khung. Rooney goal pakhat zawk hi yard 40 vel aṭanga half volley hmanga a khung a ni a, goal ropui leh danglam bik a ni.

Manchester United legend chuan, "Tunah chuan dinhmun duhawm takah kan awm ta. Goal nga ngawt mai kan khung a, kha khan inrintawkna nasa tak min pe a ni," tiin result duhawm tak an hlawhchhuah thu an sawi.

Hetihlai hian United tana Roo­ney nena khel dun hman Zlatan Ibrahimovic pawhin goal a khung chhunzawm zel a, kum 36 mi striker hian Los Angeles Galaxy chu Vancouver Whitecaps lakah 3-0 in hnehna a chanpui a, goal hnih a khung - tun season-ah goal 20 a khung tawh.

Rooney khelhna DC United hi Eastern Conference-ah pasarihna an ni mek a, an chung chiaha awm Montreal hi match hniha khel tlem chungin point hnih chauhin an phak lo a, match nga khelh tur an la nei bawk - playoff khel thei dinhmunah an ding mek.

Ibra khelhna LA Galaxy hi Western Conference-ah pasarihna an ni mek a, an chung chiaha awm Real Salt Lake chu khelh zat inangah point hnihin an phak rih lo thung.

MLS hi khawvel hmun danga football league angin kalpui a ni lo. Eastern Conference-ah team 11 awmin Western-ah team 12 an awm bawk a, conference pahnih aṭanga a sang paruk hian playoff round an lut.

Conference pahniha pakhatna leh pahnihna chu conference semifinal lut chiang sa an ni a, pathumna aṭanga parukna team pali ve ve te chuan playoff an khel.

Playoff-a chak ve ve team pahnihte hi semifinal-ah lut ve lehin pakhatna leh pahnihna te kha an hmachhawn ve leh a, heta chak ve ve te hi Conference finals-ah lut ve lehin MLS Cup final-a intawng tur an zawng leh ṭhin a ni.