Duhsak hlawh Hamilton a chak

Lewis Hamilton chuan Mercedes car a khalhpui Valtteri Bottas tlan pelin Russian Grand Prix-ah hnehna a chang a, Britain tlangval hian intlansiak hmabak panga chauh an neih tawhah point 50 zetin hma a hruai fal ta.

Duhsakna

Pathianni zan intlansiakah pole position aṭanga bul ṭantu Bottas a tlan ṭha hle a, lap 25 an tlan thlengin hma a hruai. Mahse, lap 53 an tlan tur zinga 25 an tlan lai hian a hnung chiaha awm Hamilton chu in­tlan pelh tir turin team lam aṭangin thu pek a dawng a, pahnihnaah inhnuk hniamin an hnunga awm Sebastian Vettel ven chu a hna a ni chhunzawm tluan chhuak zak.

World champion vawi li ni tawh Hamilton hian car intlansiakna sang berah hian vawi 70 hnehna a chang tawh a, record nei ṭha ber leh vawi sarih champion thei Michael Schumacher chu vawi 21 ngawtin a la phak lo thung - chutihrualin a vawi nga nan chuan a champion ngei dawn niin a lang ta.

Tun hnaia beisei phak lo Vettel chu pathumnaah a thleng, German driver Vettel tan champion nomawi chu beisei phak la ni mah se vanneihna a mamawh tel tawh. Mercedes car pahnih hnungah hian Ferrari car khalhtu Vettel leh Kimi Raikkonen te an thleng. Driver langsar pali hnungah hian kum 21 tlin lawm nan Max Ver­stappen a thleng ve bawk a ni.

A la tawp lo

Vettel leh Hamilton ten Formula 1 nomawi pali ve ve an nei tawh a, tunlai driver inel tak pahnih hi kuminah pawh inum tawk ber an ni. Point 50 zeta sang fal tawh Hamilton hi champion tura rinkai a ni a, chutih rualin Vettel a la beidawng bik lo.

Kum 31 mi Vettel chuan, "A nihna takah chuan kan kutah a innghat tawh lo, midang chetsual kan chan a ngai tel tawh. Kan tih theih san ber chu intlansiak hmabak panga la awma hnehna chan vek a ni a, chumi tur chuan chawl loin kan thawkrim chhunzawm ang," a ti.

Hnehna a chan danah Lewis Hamilton a lawm a, a team mate Valtteri Bottas a fak hle. Hamilton chuan, "Valtteri khan inelna a hmachhawn ṭha em em a, kawng min kian thei kha a ropui lai chu a ni. Khatiang thil tih kha Valtteri tan a harsat tur zia chu ka hriatthiampui," tiin a sawi.

2018 Formula 1 Russian
Grand Prix - Race Results
1 Lewis Hamilton GBR Mercedes
2 Valtteri Bottas FIN Mercedes
3 Sebastian Vettel GER Ferrari
4 Kimi Raikkonen FIN Ferrari
5 Max Verstappen NED Red Bull
6 Daniel Ricciardo AUS Red Bull
7 Charles Leclerc MON Sauber F1
8 Kevin Magnussen DEN Haas
9 Esteban Ocon FRA Force India
10 Sergio Perez MEX Force India