Halep hliam niah Kerber a chak

China Open khelh laiah Simona Halep chu hliam vangin first round an khelh laiin a inhnukdawk a, world number 1 a tlak lai hian Angelique Kerber leh champion lai Caroline Garcia te erawh an chak thung.

Pathianni zan inkhelah Halep hi Ons Jabeur nen an intawng a, hnungzâng na vangin Romanin nula a khel ṭha lo; set hmasa ber 6-1 in a hloh hnuah a inkhel chhunzawm thei ta lo a ni.

Kum 27 mi Halep chuan, "Na ka neih avangin ka che vel a fuh thei lo. Ka khel zui zel a nih chuan thil ṭha lo zawk thleng thei a nih avangin ka chawl, match khel zo thei loa ka awm hi hrehawm ka ti hle," tiin a sawi.

Inkhel dangah champion lai Caroline Garcia chuan khawtual nula Wang Yafan chu 7-6 (12-10), 6-7 (4-7), 6-3 a hnehin second round a inhlangkai. Seeded pathumna Kerber pawhin Kristina Mladenovic lakah 6-2, 6-2 a hnehna changin; Seeded pakuana Sloane Stephens chuan Anastasia Pavlyuchenkova 6-7 (8-10), 6-4, 6-4 in a hneh ve bawk.