Mourinho-a'n hun tam a nei tawh lo

Manchester United chuan zanin dar 12:30 hian Old Trafford-ah Valencia an mikhual dawn a, Jose Mourinho hmalam hun atan UEFA Champions League inkhel hi a pawimawh ang.

Buaina a awm

Football-ah chuan result a ṭhat chuan buaina chu a chinfel mai theih niin an sawi ṭhin a, Manchester United erawh season ṭan hmaa an buaina chu result ṭhain a chhunzawm loh avangin an buai tulh tulh.

United hian league match sarih an khelhah vawi thum chak loin vawi khat an khingpui nen an inhnehtawk a, point 10 chiah hlawh chhuakin 10-naah an awm mek. Hei bakah hian League Cup-ah Championship club Derby County hneh loin an tla nghal.

Result ṭha an neih loh vanga an buaina bakah hian manager leh player inkarah fel lo a awm a, season hmasa lamah ke ruh tliak dam hlim Luke Shaw chungah Mourinho-a'n zahngaihna a lantir lo a, English left back chungah hian media kaltlangin ṭawngkam fei ki bar a hmang nasa hle.

Tun season ṭantirhah Mourinho hi chief executive Ed Woodward nen player lei kawngah an in bakkaih a, hemi hnu hian Portuguese manager hian tun hmaa a hmanraw ṭangkai ni ṭhin media chu hmelmaah a chhuah.

Player chungah ṭuan lehin khelhna hmun chang tam lo Anthony Martial chu a bul ṭanna a ni a, Paul Pogba nena an buaina a langsar a, West Ham an hneh loh ṭuma squad chang pha lo Alexis Sanchez pawh a lawm bik lo niin thuthang a awm chho zui leh ta bawk.

Mourinho hian United manager hna a thawh ṭantirh lamah legend Paul Scholes a khak tawh a, tunah chuan Scholes bakah club legend dang Rio Ferdinand te pawhin United khelh dan chuan champion zia an hlat thu a sawi tawh a. An hmelma pahnih Liverpool leh Manchester City te an elphak loh avangin Mourinho dinhmun a nghet tawh lo.

Inkhel pawimawh

Manchester United chuan zanina Valencia nen an inkhelh hma hi chuan Mourinho chungchangah thutlukna siam an la tum lo tih chu khawtlang media thuziah dan hmangin a chiang tawh a, hemi zawh lam erawh result-in nghawng thui tak a nei ang.

Mourinho chuan, "Thawhlehni zana inkhel ka nei lehnghal hi ka lawm takzet. Chak loh zawha rilru hrehawm taka kar khat tawp hun hman ai chuan inkhelh leh thuai hi ka duh a, ka player-te pawhin ka ngaihdan hi an ṭawmpui ka ring," tiin chak result hmanga an boruak siam ṭhat a tum thu a sawi a, player rilru put hmangah sawisel a neih loh thu a sawi bawk.

United khingpui tur Valencia pawhin result ṭha an nei bik lo a, league match sarih an khelh tawhah vawi khat chiah an la chak a, amaherawhchu Mourinho hote tana hriat nuam lo tur erawh Spanish club chak hnuhnung ber hi kartawp mai kha a ni.

UCL-ah chuan...

Champions League lamah erawh Valencia hian an match hmasa berah player 10-a khel Juventus chu an muala an hmachhawn chungin 2-0 in an hneh lo a, United erawhin Young Boys 3-0 in an hneh thung.

Khawvel huapa Jose Mourinho hming a inchher ṭanna pawh Europe inelna lian ber hi a ni a, kum 2004 khan an ram club FC Porto chu Champions League-ah a champion pui. Amaherawhchu hemi hnu hian UCL nomawi vawi khat chiah a chawi belh a, chutih rualin Champions League-a vawi hnih aia tam champion thei chu manager pathum chiah an awm thung.

Mourinho tluk loh manager pathum chu Bob Paisley, Carlo Ancelotti leh Zinedine Zidane te an ni a, Portuguese manager thlakna tura French manager Zidane hming a ri ring pawh hi a mak lo.

An sawi zawm

Khawthlang media chuan Champions League hnuhnung pali chawi thei Zinedine Zidane chuan United nena an insawizawm chungchanga insawifiahin Mourinho hi a bia niin an tarlang.

French manager hi a club hlui Juventus-ah chief executive ni turin a lut dawn niin sawi a awm bawk a, chutihrualin Zidane chuan a aiawh hnen aṭangin United enkawl a duh leh duh loh chungchang zawh erawh a dawng tawh thung.

United hian an buaina neih mek hi tihtawp an tum a, khawvelin an thlir ṭhup. Jose Mourinho ban hun erawh tunkara an result-in a hril dawn. Mourinho hote hian Valencia an hmachhawn zawn hian kartawpah anmahni ang bawka talbuai Newcastle United an mikhual ang.