Mizoram Lockdown (inkharkhip) ni 107

England striker ropui tia hriat hlawh reng tawh tur Wayne Rooney-a'n September 8, 2015 khan ram tana a goal 50-na chu Euro 2016 qualifying match-a Switzerland an hmachhawn ṭumin a thun a, England tana goal khung hnem ber Sir Bobby Charlton-a record (49 goals) chu a khum. 

Rooney-a'n England tana a goal 50-na a khungna inkhel hi ram tana match 107-a khelhna chiah a ni bawk a, a professional career-a goal 300 a khung tlinna chiah a ni bawk. Kum 2008, 2009, 2014 leh 2015 khan England Player of the Year-ah thlan a ni a, vawi li he chawimawina hi dawngin tun thlenga England Player of the Year chawimawina dawng ngun ber a ni mek.

Rooney hian ram tan match 120 khel hmanin goal 53 a khung a, nomawi liantham chawipui erawh a nei lo thung. November 4, 2018 khan Wembley Stadium-ah USA hmachhawnin ram tana a match hnuhnung ber a khel a, he friendly match hi midang ṭanpui tura a pawl din tih lar nana tih a nih avangin, "Wayne Rooney Foundation International," tia hriat a ni. Championship club Derby County tana khel mek Rooney hian Everton-ah a career ṭanin season hnih a khel hman a, kum 2004 khan Manchester United a zawm. Red Devils tan 2016-17 season thleng a khel a, match 559-ah goal 253 khungsakin United tana goal khung hnem ber record a chelh mek.

United tan hian Premier League (5), FA Cup (1), League Cup (3), Champions League (1), Europa League (1) leh FIFA Club World Cup (1)-ah champion nomawi a chawi a, Everton leh DC United tan khel bawk mah se nomawi erawh a chawipui lo.