Shrewsbury ngamtu Liverpool naupang

Thawhlehni zan khan FA Cup fourth round replay khelh a ni a, Liverpool chuan player naupang rual an khelhtir chungin Shrewsbury Town chu 1-0 in an hneh. 

Liverpool chanchina starting XI kum belhkhawm naupan ber ṭumah hian Ro-Shaun Williams 'own goal' chu Reds hian chak nan an hmang a, last 16-ah Chelsea an tawng zui ang. 

Jurgen Klopp-a'n Anfield-a inkhel awm hma hian Premier League thlasik chawlh a nih anga naupang rual an khelh tur thu a sawi a, Liverpool Under-23 chu an boss Neil

Critchley hoin an inlan.

Premier League club dang inkhelah Newcastle United chuan 3-2 in Oxford United an hneh a, kum 14 hnua a vawi khat nan FA Cup round of 16 an lut ve leh ta. 

Premier League-ah Reds player-te thlasik chawlh an neih tur thu Klopp-a'n a hrilh lawk a, match hmasa zawkah Shrewsbury hi 2-2 a an inhnehtawkpui avangin chawlh laia replay khelh a ṭul.

Klopp-a'n a senior player-te chawlh a lo pek tawh avangin a thutlukna sut a duh lo a, Under 23 boss hoin naupang rualin an khelh tur thu a sawi. German coach sawi lawk ang ngeiin squad pumpui hi Reds U23 player an ni. 

Liverpool player-te kum hi chawhrualin kum 19 leh ni 102 a ni a, Carabao Cup quarterfinal-a Aston Villa ngam lotu Reds squad kum chawh rual kum 19 leh ni 182 ai khan an naupang zawk. 

Kum 19 leh ni 5 mi Curtis Jones chuan captain armband a rawn hreng a, Liverpool first team tana captain ni thei naupang ber a ni - Jones leh kum 16 mi Harvey Elliott te chu Premier League khel tawh an ni a, an khelh zat belhkhawm erawh minute 20 a ni thung!

Anfield-ah fans 52,399 an pungkhawm a, Under 23 tan baka la inlan tam lo Liverpool player-te tan chuan a zamawm rum rum hial mai thei - mahse huaisen nan an hmang zawk a, an hmuhnawm hle. 

Team pahnih dinhmun 0-0 a nih laiin Shaun Whalley chuan goal a rawn khung a, Liverpool fan ni chunga seilian midfielder hian a stadium khelh chakna Anfield-ah a goal khung a lawm. 

Mahse, referee-in video assistant referee (VAR) a rawn a, Whalley-a goal khung hma hian offside a lo awm avangin pawm a ni lo - Liverpool fans an thaw huai. 

Minute 75-naah Reds tan hun ṭha a her chhuak a, Liverpool right back Neco Williams-a cross chu League One club defender Ro-Shaun Williams chuan an lamah a ti lut palh a, 1-0 in an tlawm phah. 

Liverpool senior player-ten chawlh an lak laiin hliam dam hlim James Milner chuan training a zawm a, U23 coach Neil Critchley chu dressing room-a luh leh bench hnung lama ṭhut ve a dil zui!

Klopp aiawhtu Critchley chuan, "Kan zinga tel ve min dil ringawt pawh kha a zahawm ka ti a, dressing room-ah pawh a ṭangkai em em. Ka hnung lamah player-te khelh dan tur hrilha a lo au ka hre thei a, ka lawm takzet a ni," a ti. 

Liverpool-in hnehna an chan leh tak avangin hmabak a êng hle. Klopp-a team hian UEFA Super Cup leh Club World Cup nomawi an chawi der tawh a, nomawi dang pathum an la beisei mek bawk. 

FA Cup last 16 an lut a, Premier League-ah point 22-in hma an hruai fal mek a, February 18 zanah Atletico Madrid nen Champions League last 16 first leg an khel dawn bawk - season duhawm bik a ni. 

Newcastle United-in minute 30 chhungin Sean Longstaff leh Joelinton hmangin goal an khung a, League One club Oxford United lakah awlsam taka chak tura ngaih an ni. 

Mahse, St James' Park-a goal khung loa Magpies chelh theitu Oxford-in tlawm an tum lo a, minute 84-naa Liam Kelly freekick goal leh Nathan Holland-a injury time goal hmangin an chhanglet. 

Magpies-in extra time an khelh a ṭul phah a, mahse hun tawp nan minute li chauh a awm tawh tihah Allan Saint-Maximin chuan ṭha zetin a rawn khung - Oxford an tho nawn tawh lo a, 3-2 in Magpies an chak. 

Newcastle hian last 16-ah West Brom an hmachhawn dawn a, Magpies coach Steve Bruce chuan, "Neutral fans tan en a châkawm mai thei a, kan tan erawh fixturte hautak a ni," tiin a sawi.