Liverpool zinkawng a hautak zel

Season hmasa Champions League finalist Liverpool tan group stage chauh paltlang tur pawhin a harsa tawh dawn - zanin dar 12:30-ah Napoli an lenchilh ang.

Hriat tel atana ṭha erawh Liverpool hian an match hmasa berah Paris Saint Germain an hneh tawh a, Italian club hi an hneh leh thei a nih chuan knockout round lut turin an dinhmun a ṭha tawh khawp ang.

Napoli erawhin hneh ngei tura ngaih Red Star Belgrade chu khualmualah goal khung loin an inhnehtawkpui a, zaninah an chak loh leh chuan an hmabaka awm hi PSG a nih bawk si avangin a awlsam tawh dawn lo.

PSG-in zanin dar 10:25-ah Red Star Belgrade an mikhual ve dawn bawk a, hnehna chang tura beisei an nei - mahse Red Star hian Napoli an inhnehtawkpui theih avangin inrintawkna sang tak an nei ang.

Chau ve ve
September atana Liverpool fixture a chian khan mi zawng zawngin an huphurh pui. Tottenham Hotspur, PSG, Southampton, Chelsea, Napoli leh Manchester City chu an hmaa inchhawp an ni!

Liverpool-in Spurs, PSG leh Saints a zawnin an hneh a, League Cup-ah Chelsea lakah an tlawm zui. Blues nen hian Premier League-ah an intawng zui a, 1-1 in an inhnehtawk.

Reds-in an kalpel tawhte thlirin an hrawl a, an hmaah Napoli leh City an la awm cheu! Jurgen Klopp-a naute an chau ang tih a chiang a, Napoli-a zin tur zawk an nih bawk avangin dinhmun chhe zawkah an dah a nih pawhin a mak lo ang.

Hriat tel atana ṭha erawh Napoli hian an league match hnuhnung berah Juventus an hmachhawn a, 3-1 in an tlawm - a pawimawh ber chu an chau ve tho dawn tih a chiang a, Reds-in an zuam sawt ang.

King Carlo!
Napoli-in an coach Maurizio Sarri an chan dawn tih a chianin a thlakna tur coach an zawng nghal a, khawvel barakhaihin coach ṭha ber pawl Carlo Ancelotti an lalut - an tumah an chiang.

Chelsea, PSG, AC Milan, Real Madrid leh Bayern Munich pawh lo enkawl tawh coach hian Champions League nomawi ringawt pawh vawi thum a chawi tawh a, Italy, England, Spain, France leh Germany-ah league nomawi a chawi vek tawh!

Kum 59 mi manager hian tawnhriat a ngah tawh avangin hei ringawt pawh hi Napoli tan chuan ṭhatpui tham a ni a, Liverpool tan hna a awlsam dawn lo.

Italian manager hian Champions League-ah Liverpool hi vawi hnih ngawt a lo hmachhawn tawh - final-ah ve ve a ni! Kum 2005 khan Liverpool comeback ropui avangin a tlawm a, 2007-ah erawh Reds lakah tlawm tawh loin AC Milan a champion pui.

Liverpool 5-0 Napoli
Season ṭan hma khan friendly match-ah Liverpool leh Napoli hi an lo intawng tawh a, English club-in 5-0 ngawtin hnehna an chang!

James Milner, Georginio Wijnaldum, Mohamed Salah leh Daniel Sturridge ten goal khat ṭheuh an khung a, Italian club-in a chhanletna tur an nei lo.

Liverpool-in he result hre reng chung hian 'kan thei a ni' tih rilru nen Naples khawpui an pan ang a, Napoli player ten he result hi 'friendly mai mai' tichungin huaisen takin Liverpool an lo mikhual ang.

Reds hian Italian club an ngam ṭhin hrim hrim. Italy-a an zin hnuhnung vawi riatah vawi hnih chiah an tlawm a, thawnthu hlui keu chuan history chu Liverpool lam ṭang zawk a ni.

Buai dan ṭha
Liverpool coach Jurgen Klopp-a'n buai dan ṭha tak a nei a, chu chu tun hnaia Daniel Sturridge 'form' lutuk hi a ni. English striker hian a match hnuhnung pathumah goal thum a khung tawh a, goal hnih hi chu goal ropui bik a ni.

Klopp-a'n tlarhmaah chhawr ṭhan Sadio Mane, Roberto Firmino leh Mohamed Salah a nei sa a, Sturridge tan hmun a awm ang em, tih chu zawhna awm a ni ta.

German coach formation hman ṭhan chu 4-3-3 a ni a, tlarhmaa a hman thiam sa pathum thlak loa Sturridge khelh tel tir a duh a nih chuan 4-2-3-1 hmanga Firmino chu striker hnung chiahah a dah a rinawm.

Hetihrual hian City la hmachhawn tur an nih avangin in chawlh hahdam ṭhentir a nei a nih pawhin a mak lo ang.

A pawi!
Liverpool-in Napoli an huphurhna aiin Italian club-in Reds an huphurhna a sang zawk niin a lang. Naples khawpuia journalist lar Andrea Falco chuan, "Pot 3-ah Liverpool an awm tih kan hriat khan group khata awm loh hram kan duh a ni," a ti a, Reds an huphurh thu a pha lo.

Napoli chairman Aurelio De Laurentiis pawh a lungawi lo. Season hmasa finalist nichunga pot 3-a Liverpool an awm chu a lo sawisel tawh a, English club hmachhawn hi an châk lo a ni.

Mahse, Italian club hi indawm kun lutuk tur an ni lo.Tlarhmaa innghahna Lorenzo Insigne chuan match sarihah goal nga a khung der tawh a, a kawppui tura duhthlan turin match ruka goal thum khungtu Arkadiusz Milik leh Dries Mertens te an la awm.

An hriat tel atana ṭha erawh Virgil van Dijk hoin Reds tlarhnungin hma an sawn zel a, a hnung berah goalkeeper Alisson Becker a la awm cheu bawk.