Tottenham vs Barcelona ; Messi vangin lawm rawh u - Poch

Tottenham Hotspur chuan zanin dar 12:30 hian Champions League group stage match khel turin Lionel Messi telna Barcelona an mikhual dawn a, Spurs boss Mauricio Pochettino chuan Messi an hmachhawn theih dawn avanga lawm turin a naute a fuih!

Argentine manager chuan, "Messi dan dan tur hi ngaihtuah ka tum lo. Ka player-te hnena ka sawi tur chu 'Nuam ti takin khel rawh u, khawvela footballer ṭha ber pawl hmachhawnna remchang in nei hi hlim rawh u' tih hi a ni.

"Messi vanga lo lungngaih lawk hi a ṭul lo a, hlim takin an thlir zawk tur a ni. Nakinah an fate hnenah 'Messi ka inkhelhpui tawh asin' an ti thei dawn a ni," tiin a naute chu phur taka inkhel turin a fuih.

Spurs hian Champions League group stage-a an match hmasa berah Inter Milan chu 2-1 in an ngam lo a, Italian club laka an tlawm hma hian Watford leh Liverpool lakah an tlawm bawk.

Zaninah London club hi an tlawm leh a nih chuan last 16 lut turin an zinkawng a hautak tawh dawn tih a chiang reng a, hnehna chan an tum ngam a ṭul ang.

Hriat tel sak atana ṭha chu Inter an ngam loh hnuah hian Brighton, Watford leh Huddersfield te a zawnin an hneh leh tawh a, sawisel hlawh Harry Kane chuan tun hnai match hnih a inlanah goal thum a khung leh tawh bawk.

Barcelona mikhual hi engtiklai mahin thil chakawm ni lo mah se tun hnaiah Catalan club-in result duhawm an nei thei lo a, duhthlang thei ni se Spurs hian tun hun ang bak hi an thlang chuang lo ang.

Catalan club hian league match hnih chu chak hmel an hmu tawh lo. Leganes lakah 2-1 in an tlawm a, Athletic Bilbao lakah thawh tum teh mah se 1-1 in an inhnehtawk zui.

Spanish La Liga mawngphah luahtu Leganes-in Barca an hneh thei tih hre chungin Spurs an inlan ang a, Ernesto Valverde enkawl team hi an zuam sawt ang.

Group B inkhel dangah Barca-in 4-0 a an sawp hnu PSV Eindhoven chuan zanin dar 12:30-ah vek hian Inter Milan an mikhual ang.