Electric Veng an inthuamṭha

Mizoram Football Association chuan MPL club leh an hnuaia District FA tan October thla chhung transfer an hawng a, tualchhung transfer a ngaihnawm ṭan.

MPL7-a beisei phak baka che ṭha Electric Veng chuan Tata Trust hnuaia tun hnaia Germany-a football zir Emanuel Lalchhanchhuaha, Pehlawn leh Ramhlunchhunga Hmar, Kolasib Electric Veng te an lalut.

Electric Veng midfielder Vanlalremkima (Tetea) chu match hnuhnung bera Bethlehem Vengthlang an hneh ṭuma hnawhchhuah a nih avangin match hnih a khel thei dawn lo a, India sub junior player hlui Emanuel-a tan hun ṭha a inhawng nghah thei ang. Subroto Cup sub junior best player ni tawh Chhunga hi winger a ni a, khelhna hun remchang a inhawn thuai beisei theih a ni bawk.

Club Manager Lalchhanhima chuan, "Midfield leh wing-a khel an ni a, kan mamawh tak te an ni. Football-a theihna neih ṭhat vanga Germany-a kal thei, an thiamna leh theihna tipung tura kan team-a kan lalut thei hi kan lawm khawp mai, team min tihchak ngei kan beisei," tiin a sawi a, MPL club thar hian squad thuam chak nan player dang an la beisei bawk.