AFC-in Bektur Talgat lalut

Aizawl FC-ah player thar Kyrgyzstan midfielder Bektur Talgat Uulu a lut.

AFC-ah Alfred Kemah Jaryan a la rinawm reng a, MPL7-ah Liberian midfielder bakah hian striker Francis Dadzie (Ghana) leh midfielder Amadou Alou Sissoko (Mali) te an ziaklut. Amaherawhchu, Dadzie leh Sissoko ten visa an tihfel theih loh avangin I League club-in player dang an melh a, Liberian forward Ansumana Kromah an lakluh hnuin nimin khan Kyrgyzstan midfielder Bektur Talgat Uulu an lakluh thu an puang.

Aizawl FC thuchhuah chuan Churchill Brothers midfielder hlui hi October 4, Ningani hian a thlen hman an beisei thu an tarlang bawk.

I League club coach Gift Raikhan chuan, "Foreigner-a buaithlak lai chu visa hi a ni a, chuvangin visa fel sa lak hi a him ber a. Hei bakah hian India ram hrechiang sa lak hi a ṭhatna tam tak a awm a ni," tiin Vanglaini a hrilh.

Aizawl FC hian I League-ah foreigner panga an neih an tum a, an player hlui Ivorian forward Leonce Dodoz Zikahi leh Nigerian defender Kareem Omolaja te chu la nghet leh tawhin training an zawm tawh a, amaherawhchu MPL lamah an inlan a rinawm loh.

Aizawl FC coach Gift chuan, "I League-a kan player panga chhawr tur a chiang tawh a, MPL-a kan hman tur player pathum erawh kan la tichiang thei lo. Tun Zirtawpnia Chawnpui nen kan inkhelh hunah chuan mi thar an la awm ka ring lo a, Serchhip-ah erawh mi thar an awm ngei ang," tiin Vanglaini a hrilh a, MPL 7 khelhna tur Serchhip tan chuan hriat nuam tak a ni ang.

Tun season MPL round 7 chu Serchhip-ah khelh a ni dawn a, I League club hian Serchhip-a MPL inkhel hmasa berah Bethlehem Vengthlang FC an hmachhawn ang.