WTA Finals khel tur Osaka

Season tawpa a thiam pariat ten an khelh tur WTA Finals-ah Naomi Osaka a inlan dawn, Japanese nula bakah hian world number 1 Simona Halep leh Wimbledon champion Angelique Kerber te chu an tling chiang tawh bawk.

US Open champion Osaka hian a taksa chauh vangin kar hmasa khan Wuhan Open a khel lo a, Thawhṭanni khan China Open first round khelin Zarina Diyas chu 6-4, 6-3 in a hneh.

China khawpui Beijing-a inkhelah a khingpui service vawi nga a chhuhsak thei a, set hnih an khelh chhungin buaina lian tham a tawk lo. Second round-ah chuan American player Danielle Rose Collins nen an intawng leh dawn a ni.

WTA Finals khel tura a tlin chungchang sawiin Osaka chuan, "WTA Finals khelh theih chu ka tan duhthusam a ni, kum thum liam ta khan junior huangah ka lo champion tawh a, senior erawh ka vawi khat khelhna tur a ni," a ti. Osaka hi world number 6 ni lai a ni a, WTA Finals khel tur hi season khat chhunga an chetṭhat dana teh a nih avangin a tling hma.

October 21-28 chhung Singapore-ah WTA Finals hi khelh tur a ni dawn a, champion lai Caroline Wozniacki-i'n tun season chhungin Australian Open nomawi a chawi avangin tling leh thei hnai ber a ni, ani bakah hian Petra Kvitova chu a dinhmun a ṭha tawh bawk.

Hmun ruak dang luah tur erawh a la chiang lo, Sloane Stephens, Elins Svitolina, Karolina Pliskova leh Kiki Bertens ten tlin tumin an inchuh ang. Europe leh US lama tennis season hmang zo rih mah se, Asia lamah inelna neih mek a ni - ranking siam theihna hun a la awm.