Pro Fight vawiinah a chiang dawn?

Tualchhung boxing inelna lian ber Zothan Autoworks LPS Pro Fight neih tura ruahman tawh sa chu ṭhulh mai theih din­hmunah a ding mek a, vawiin hian inelna buat­saihtu lam chuan kaltlang pui tur a nih leh nih loh chung­chang an ngaihtuah ang.

A hun tur la chiang lo mah se kum tawp lamah MLA inthlan a awm dawn a, hemi atan hian R. Dengṭhuama Indoor Stadium chu sipai awm nan leh, vote chhiar nan hman a ni dawn - Pro Fight khelhna tur hmunah hetiang thil hi tih a ngaih avangin khelh theih a ni dawn em tih a chiang ta lo a ni.

Kuminah hian season danga an la tih ngai loh angin state pawn boxer sawm luh an ni dawn a, inelna lian zawk leh mipui huapzo zawk kalpui tur a ni. Dengṭhuama Hall a rem lo a nih chuan Organising Committee chuan a tir aṭanga a tawp thlenga Pro Fight dawl zo tur hall dang a awm lo niin a hria.

Ruahmanna awm saah chuan October 4, Ningani zing dar 7:00 aṭangin Hawla Indoor Stadium, Republic Vengthlangah tel tur zawng zawng an inbuk ang a, medical test an nei bawk ang.

Beisei angin kuminah khelh theih a nih loh chuan Pro Fight khelh hun sawn a ngai dawn a, nakkum February leh March tin zawn nghal a ni.