Tlang lawn khan min siam ṭha - Djokovic

Novak Djokovic chuan season chawhnu lama a chet ṭhat chhan chu, a nupui nen inti thawveng tura tlang an lawn chu a chhan bulpui nia a hriat thu a sawi.

World number 3 hian kum bul ṭan fuh lo hle mah se, inelna ngaihhlut pali zinga pahnih - Wimbledon leh US Open nomawi a chawi thei a, season tawpa khelh tur ATP Tour Finals-ah pawh champion tura rinkai ber a ni mek.

Grand Slam vawi 14 cham­pion tawh Djokovic chuan, "Season hman laia kan danglam ṭanna pakhat ka sawi dawn a nih chuan French Open quarterfinal aṭanga ka thlak kha a ni ngei ang.

"Paris aṭanga ka haw hnu khan ka ngui hle a, ka taksa bakah rilru thlengin insiamthar ka ngai. Ka nupui Jelena nen tlangah ni nga chhung hun kan hmang a, siamtu thil siam mawina leh ṭhatna chu a nihna ang takin kan hmu, rilru thawveng leh nuam taka hun kan hman khan min ti zangkhai hle," a ti.

Hlawhtlinna a chan chung­chang sawi zuiin Serbian tlangval chuan, "Tennis court-ah ka lut leh a, chumi hnuah Wimbledon, Cincinnati leh US Open nomawi ka chawi zui, nomawi lian tham ka lak leh chiah kha chuan ka kiu na an zai kha duhthusamin a dam tawh tih ka hre thei a ni. Tunah pawh buaina nei loin training ka nei thei a, kum tawp hi a ṭha thei ang bera khar ka tum ang," tiin a sawi.