Bottas tan ka tlan ve ang - Hamilton

Lewis Hamilton chuan a ṭul a nih phawt chuan a teammate Valtteri Bottas chu phal taka a intlan pelh tir ve tur thu a sawi chhuak, Mercedes driver thusawi hi season tawp lama champion a chian hnua thil thleng tur a nih a rinawm.

Kar tawp a tlan zawh tak Russian Grand Prix-ah khan hmahruaitu Bottas chu a hnunga awm Hamilton intlan pelh tir tura tih a ni a, team championship lama hmahruaitu Mercedes hian an driver Hamilton zawk hi champion ngei turin an vulh tih a chiang.

World champion vawi li ni tawh Hamilton-a'n hnehna a chan avang hian Ferrari driver Sebastian Vettel lakah point 50 zetin hma a hruai fal theih ta a, intlansiak hmabak panga chauh a awm tawh avangin a dinhmun a ṭha tawh hle.

Britain tlangval Hmailton chuan, "Season hmasa pawh khan Valtteri hi a tlan ṭha tawh hle, kuminah pawh atana hna ka thawh ve hun a awm a nih chuan ka la thawk ve ang," a ti. Mercedes team principal Toto Wolff pawhin an thil tih dan kha induhsakna vang ni loin, team tana ṭha ber tur an ngaihtuah vang a nih thu a sawi tawh.

Bottas hian July thla khan season khat daih contract a ziak thar a, nakkumah pawh Mercedes car a la khalh chhunzawm dawn tihna a ni. Amaherawhchu, Hamilton nen an awmdun reng a nih chuan chungnung zawk nih a harsa hle tura ngaih a ni.

Kum 29 mi Bottas chuan, "Team tana hna thawh hi ka duh dan a ni, tun hnaiah khan team tan ka thawk a, a ṭul a nih chuan a leh pekah pawh team tan bawk ka tlan ang. Chutih rualin season thar erawh beiseina sang tak nen ka thlir a ni," a ti. Nakkumah chuan champion thei dinhmun zawka din a tum.