Wozniacki a chak phawt

Hmeichhe tennis player langsar Caroline Wozniacki-i'n tun hnaiah result ṭha a nei hleithei lo a, China Open khelh mekah erawh world number 2 hian Belinda Bencic chu darkar khat leh minute 32 chhungin 6-2, 6-3 in a hneh.

Season laihawl lai khan Eastbourne-ah Wozniacki hian Angelique Kerber hnehin nomawi a chawi a, a hnu lamah erawh title a la chawi leh lo. Wimbledon leh US Open-ah te second round pawh a paltlang lo. Beijing-ah erawh a khelh fuh ṭum a tawng a nih chuan champion thei tur zinga mi a ni.

Thawhṭanni zan inkhel dangah Garbine Muguruza chuan Ekaterina Makarova chu 6-0, 6-4 in a hneh ve bawk. Khawtual nula zinga thleng sang tura beisei awm Zhang Shuai chuan Elise Mertens lakah 6-1, 3-6, 6-3 a hnehna changin second round a inhlangkai ve bawk.