Zaninah a chung bera awm tur zawnna Chhinga Veng Vs Electric Veng
Chhinga Veng mipui leh Electric Veng mipui tan zanin hi Lammual pan zan a ni.
Mc Dowell's No. 1 Soda Mizoram Premier League Season 7-ah team che ṭha fal pahnih Chhinga Veng leh Electric Veng te chu zanin dar 7:00 hian Lammualah an inhmachhawn dawn.
Hneh loh an la tawng lo ve ve, point 13 hmu ve ve an ni. Chhinga Veng hi champion lai an ni a, Electric Veng hi tun dinhmuna ṭantu nei ṭha ber an ni a, an intawng tur hi tun dinhmuna MPL inkhel en châkawm ber a ni.
An intawng tawh
I Day Football-ah Electric Vengin semifinal an thleng a, group stage an paltlang danah fak chiam mah se boruak sang erawh an zo lo. MPL club thar hi champion lai Chhinga Veng lakah 2-0 in an chak lo.
Chhingcows tan Lalrinchhana leh Lalthlamuana ten goal khat ve ve an khung a, rawlthar duhawm F. Lalnuntluanga chu man of the match a thlan a ni.
Team ṭha ber
Electric Veng coach Vanlalsawma Colney chuan, "Chhinga Veng hi team ṭha ber an ni. Nomawi zawng zawng kawltu an ni a, tun season-ah pawh hneh loh an la tawng lo a, Mizoram coach ṭha ber enkawl an nih bawk avangin team ṭha berah kan pawm thlap," tiin an khingpui a fak.
An inkhelh tawhna sawi zuiin Sawma chuan, "Keini tan chuan kan thlen chin apiang hi thil thar a ni a, kan intawn hmasak ṭum khan kan hneh lo. Amaherawhchu tunah chuan kan chak lohna aṭangin kan inzir a, kan innghahna mipui chakna nen point thum hlawhchhuah tumin Lammual kan pan ang," a ti.
Electric Vengin Chhingcows an hneh loh hnuah Aizawl FC, Mizoram Police FC leh Chanmari FC te an hneh leh tawh a, inrintawkna an ngah khawp ang.
Zanin hian an midfielder Vanlalremkima (Tetea) chu hrem vangin an chhawr thei dawn lo a, captain C. Laldinmawia hliam a la dam loh avangin Pehlawn rawlthar Emanuel Lalchhanchhuaha tan bul ṭan theihna hun ṭha a ni ang.
Mipui mit fukna tur erawh goal li khung tawh David Lalchhuanawma a ni a, Salem Veng tlangval hi tun hmain tlarhnungah hman ṭhin ni mah se Electric Vengin forward-ah an chhawr a, an tifuh takzet.
Team zahawm
Chhinga Veng coach Lalsangzuala Hmar chuan, "Electric Veng hi team zahawm an ni a; coaching staff, player leh mipui thleng hian an hawihhawm em em a, tun dinhmun thlen hi an phu a ni. Player aṭanga thlir chuan kan team hi an dah ṭha zawkah an ngai a ni thei a, amaherawhchu football-ah chuan team thawhhona ṭha neih hi a pawimawh hmasa ber a ni a, Electric Veng hian hei hi an neih tlat avangin keini chuan kan dah sang hle," a ti.
Chhingcows innghahna MS Dawngliana'n goal hnih a khung ta a, inhliam vanga hun rei tak khel thei lo Lalrammuanpuia (Apuia) chu match hnuhnung bera a inlan tawh bawk.
Coach Sanga chuan, "Semifinal chungchang chu sawi ngam a la ni lo. Amaherawhchu kan inkhel tur hi hmahruaitu inchuhna a nih avangin tun hi point thuma hmahruai theihna hun ṭha a ni a, hei hi bawhpelh loh kan duh," tiin chak ngei a tum thu a sawi.
Chhinga Veng hian coach Sanga hnuaiah match 22 chhung hneh loh nei loin an kal zawn tawh a, hei hi season liam taa player ṭha la khawma an record hmasa zawk nen an inang chiah.
Zanina Electric Veng laka an tlawm lo a nih chuan record thar siamin match 23 chhung hneh loh an tawng dawn lo tihna a ni - a ropuina belhchhahtu tur chu tun season Chhinga Veng hi 'star player' rual an ni tawh lo, an record erawh a la ropui zui zel.