Germany-ah City chak hram

Manchester City-in Germany-ah hnehna chang turin vanneihna an mamawh tel a, hun tawp nan minute hnih chauh a awm tawh tiha David Silva goal khung hmangin Hoffenheim chu 2-1 in an hneh hram.

Man City manager Pep Guardiola chuan, "Silva hi ka player enkawl tawh zinga ṭha ber pawl a ni," tiin a midfielder chhuanvawr a fak nghal a, Silva hian goal a khung bakah Sergio Aguero-a'n goal a khung theih nan a thawhhlawk hle bawk.

Group F inkhel dangah Lyon-in an beisei loh result an nei a, match hmasa berah Manchester City hneh mah se an mikhual Shakhtar Donetsk chu goal hnih ve ve khungin an inhnehtawkpui.

Goal hmasa

Inkhelh ṭan aṭanga second 43-na lekah Ishak Belfodil chuan City a barakhaih a, Hoffenheim tan goal hmahruai a khung. Mahse, City an ni miau a, Pep-a naute an talbuai lo.

Minute ruk hnu lawkah an si phurh sutna goal an khung a, Aguero chuan City striker chhuanvawr a nih chhan pholangin Leroy Sane siamsak chu si phurh sutna goal a tan a khung.

Mahse, City-in beisei ang ngawt erawhin goal dang an hlawh chhuak tawh lo. Hoffenheim goalkeeper Oliver Baumann chuan Sane a ti tlu niin City-in ngai mah se referee-in penalty a pe lo.

Hei le Silva

Match hmasa bera chak lo City-in point khata lungawi an zir a ṭul dawn niin a lang hman. Mahse, minute 87-naah Stefan Posch-a'n Bernardo Silva cross a awm hmanga lak a tum chu Sulva chuan lak khalhin goal-ah a chanitr a, City an chak.

Kum 21 mi Posch tawnhriat la ngah tawk lohna a lang chhuak a, mahse Hoffenheim manager Julian Nagelsmann chuan a player hi a chhan tlat. German coach, "Game ṭha tak a khel a, goal kha a thiam loh vek a ni bik lo," a ti.

Hoffenheim hian hliam vangin captain Kevin Vogt, first-choice defender pahnih Ermin Bicakcic leh Havard Nordtveit bakah German international Nico Schulz an chhawr thei lo a, Posch hi kum 20 mi Justin Hoogma nen player hliam tam avanga starting XI chang an ni.