Tlai dar 3:00-ah Mizoram Police leh Chanmari

Mizoram Police ṭhat tur zia chu Mc Dowell's No. 1 Soda Mizoram Premier League Season 7 ṭan hmaa an sawi uar ber pakhat a ni a, Chanmari FC chu ṭha tura ngaih sa a ni. Season ṭan hnuaah erawh Police leh Chanmari te chuan semifinal kawng la zawh reng mah se an chunga beiseina sang tak an phak lo.

Vawiin tlai dar 3:00 hian MPL vawi hnih champion tawh Chanmari leh a vawi khat nana nomawi chawi tum Police te Lammualah an inhmachhawn dawn a, inkhel hmuhnawm a beisei theih ang.

Police an rum mah mah?

Match hnuhnung berah Mizoram Police-in Chhinga Veng an hmachhawn a, champion laiin an chet ranna hmangin tawnhriat ngah zawk an kât a, Police-in en liam an tum lo.

Police hian tharum hmangin Chhingcows hi an bei lêt a, minute 90 chhungin yellow card paruk lai an hmu. A tawpah keeper Lalṭanpuia Ralte chu hnawhchhuah a ni bawk. Inkhelh banah penalty an beisei pek a nih loh vangin referee chungah an lawm lohna an lantir a, hrem an tawk zui.

Match referee report bawhzuia MFA disciplinary committee-in game khat khel thei lo tura hremna a tihchhuahah coach Lalbiaksanga Colney leh assistant coach Zosangliana Ralte bakah player pasarih VK Lalmalsawma, Simon Lalruatkima, C. Lalnunmawia, Lalbiaknunga, Lalramtharmawia, Lalfakzuala leh B. Zoramthanga te an tel.

Police coach BS Colney chuan, "Hremna min pek chhan hi kan hrethiam lo. Penalty vanga kan lungawi lohna kha ṭawngkain kan hrilh a ni mai a, dan phal loh a ni lo. Hremna hi hnukkir turin thuneitute hnenah kan thlen dawn e," tiin Vanglaini a hrilh a, he thu buatsaih laiin hian disciplinary committee thutlukna hriat hman a ni lo.

Mizoram Police hian hremna an tawh hma hian Chhinga Veng, Aizawl FC leh Electric Veng te an hneh lo. Season liam ta top scorer Fakzuala, midfielder thawkrim Mamawitea bakah tlarhnunga mi pawimawh B. Sena, Manunga leh Simon-a te tel loh chuan a ngaihnawm ang.

Chanmari hi...

Chanmari FC-in palina dinhmun an hauh chunga beisei an pha lo tih ṭawngkam hman a ni ṭhin hian an chunga beiseina a sanzia a pholang. Lalruatliana Sailo hote hian an match hnuhnung pahnihah kai thar Electric Veng leh Chawnpui FC te 3-1 ve ve in an hneh lo a, result aṭang ringawta thlir chu a fuh lo.

Coach Tawia chuan, "Electric Veng nena kan khel kan thlir kir a nih chuan kan vanduai tih a lang a, Chawnpui nen erawh kan khel ṭha tawk lo a, chutihrualin kan khelah hian lawmna lai hmuh tur a awm ve zel. Police nen hian Rosanga kan la chhawr thei lo a, chu ti chung chuan kan insiamṭhat theih kan beisei a ni," tiin Vanglaini a hrilh.

Chanmari hian captain C. Lalrosanga hrem vangin an la chhawr thei dawn lo a, amaherawhchu striker tawnhriat nei ṭha MC. Malsawmzuala training a zawm leh tak avangin chanchin lawmawm erawh an nei tho.

Chutihrualin season liam taa goal li khungtu MC-a tan khelhna hmun chang nghal a har dawn, Chanmari rawlthar Lalnunzama chuan match nga an khelh tawhah goal a la khung vek. Police-in tun hmain Chanmari rawlthar Jerry Mawihmingthanga an ngam lo ṭhin a, tun ṭumah pawh Zama hi an en liam a thiang dawn lo.

Tun hi Serchhip zin hmaa round hnuhnung ber a ni tawh a, Chanmari FC-in MFA Cup an lâk tawhna hmun Serchhip-a an let hmain inrintawkna neih theih nan chak result neih ngei an duh ang.