United-in chhantu an mamawh

Manchester United chu Thawhlehni zan khan Old Trafford-ah Valencia nen goal awm loin an inhnehtawk a, Jose Mourinho kaihhruaina hnuaia an buainain kian lam a pan lo.

UEFA Champions League group H-ah Young Boys 3-0 a hnehtu Juventus chu hmahruaitu an ni a, United hi point li hmuin pahnihnaah an awm a, Spanish club Valencia-in point khat hmuin pathumna dinhmun an luah thung.

United an united lo

Sir Alex Ferguson-a hnuaiah Manchester United-in minute 90 hnuah goal an khung fo a, anmahni ṭantute pawhin referee-in hun tawp hamrik a ham hma zawngin beiseina an nei ṭhin.

Tunah erawh a dang ta, Valencia nen an inkhelh ṭum hian minute 75-naah United ṭantu ṭhahnem takin an club ṭan lakah beisei an nei tawh loh avangin Old Trafford an chhuahsan a, an rin lawk ang ngeiin goal hmuh tur pawh a awm lo.

Mikhual Valencia hian hun rei tak inkhel an thunun a, United ṭantu aṭangin 'nawr ru, nawr ru, nawr ru' tih ri a chhuak leh ta a. Hun tawp ham rik zawhah pawh United ṭantu ṭhenkhatin an team ṭan chu an 'boo' a, hei hian Mourinho naute khelh dan a sawifiah.

Point khat ve ve

Valencia hian kum 2000 leh 2001 khan Champions League final kum zawnin an thleng thei a, tunah erawh rinkai an ni pha tawh lo a, La Liga match sarih khelh tawh aṭangin vawi khat chauh an chak.

Hetichung hian Old Trafford-ah point hmuh phuin an khel ṭha a, midfield-ah tharum ngah Geoffrey Kondogbia-a'n ro a rel. Tlarhmaah Goncalo Guedes chuan United tlarhnung chhaih buaiin goal khung theihna hun ṭha a hlah a, Chelsea aṭanga an hawh Michy Batshuayi pawhin a khung thei bik lo.

United lamin hun tawp lamah an mikhual hi an nawr bet thei chauh a, amaherawhchu mualneitu hian hnehna chang se chuan Valencia hi an vanduai tia chhal theih a ni ang.

United an ṭha tawk lo!

Manchester United manager Jose Mourinho chuan, "Player-in an theihna zawng zawng an chhuah a, kan khel ṭha tawk lo intih pawhin khelh ṭhat tumin an theihna an chhuah a ni," tiin a player-te a chhan a, mah se amah insawifiah nan a sel tho.

Portuguese manager Mourinho chuan, "Tlarhnung aṭanga inkhel kalhmang siam danglam turin kan theihnain a tlin lo a, kan ṭha tawk lo a ni," tiin season ṭan hmaa an player duh an laksak theih loh chu an chhiatna chhan a nih thu a sawi.

Chanchin ṭha lo...

Manchester United hian August thla Premier League ṭan ṭuma Leicester City an hneh hnuah Old Trafford-ah chak hmel an hmu tawh lo a, an mualah inelna hrang hrangah match li chhung chak hmel an hmu tawh lo. Portuguese manager tan pawh a career-a a team enkawl muala chak hmel a hmuh loh rei ber a ni bawk.

Valencia nen hian United thlen tlai avangin inkhelh hun sawn tlai a ni bawk a, kum 2016 hnua an vawi thum tlaina a ni ta bawk. Tottenham nen 2016 khan an tlai a, 3-0 in chak lo. Hemi kum vek hian Upton Park-ah an tlai bawk a, khualmualah erawh West Ham 3-2 in a hneh hram.

United captain Antonio Valencia chuan Instagram-a Mourinho an banna chungchang thuziak chu a 'like' bawk a, amaherawhchu United defender hian thuziak a chhiar chian loh vang tiin ngaihdam a dil.

Player zingah Portuguese manager Mourinho hnuaia lungawi lo an pung zel niin an sawi a, United player hlui Dion Dublin pawhin, "Player chet dan ka thlir khan player tlem te chauh khan manager tan an khel a ni. Hetianga sawi hi ka duh lo, mah se Manchester United-in Champions League-a Valencia an hmachhawn zanah khati taka chhia khan an khel tur a ni lo. An khelh dan khan min tihrilhhai a, dik lo chu a awm a ni," tiin a sawi.