Russia-ah champion lai Real an mualpho

Season thum chhung a zawna Champions League nomawi chawi tawh Real Madrid an mualpho a, Thawhlehni zan khan Moscow khawpuiah CSKA Moscow lakah 0-1 in an tlawm.

Real-in match thum chhung a zawnin chak hmel an hmu ta lo - Sevilla-in 3-0 in an sawp hnuah Atletico Madrid chu goal khung loin an inhnehtawkpui a, Russian club lakah an tlawm leh ta bawk.

Spanish club-in an match hmasa berah AS Roma chu 3-0 in sawp mah se Italian club hian Thawhlehni zan vek hian Group G inkhel dangah Viktoria Plzen chu 5-0 in an sawp a, Real dinhmun a chhe sawt.

Khilaitu Kroos!

CSKA Moscow khelmualah goal hmu turin nghah rei a ngai lo. Second 65-na lekah Toni Kroos a chesual a, khawvela midfielder ṭha ber pawl hian ball a pass sual.

German midfielder backpass sual hi Nikola Vlasic chuan a nangching a, Everton aṭanga loan-a CSKA tana khel striker hian a hun ṭha neih hlah a duh lo. Rin loh zawkin hma an hruai a, Real an hawihai.

Real player enin goal khung turin theihna an nei tih a chiang a, mahse minute 90 chhungin goal an hlawh chhuak lo - rin loh takin khualmualah an tlawm a, Real hma hun a thim sawt.

Thutlukna fuh lo

Real-in an chak loh chhanah chhuanlam tur an zawng dawn a nih chuan coach Julen Lopetegui thutlukna chu dem theih zinga mi a ni.

Spanish coach hian Sergio Ramos chu in lamah a chawlh hahdamtir a, World Player of the Year Luka Modric chu bench lamah a dah bawk - minute 50 hnulamah a luhtir ve chauh.

Hliam vangin Gareth Bale chu chhawr theih a ni lo bawk a, Cristiano Ronaldo an neih tawh bawk si loh avangin Real hi goal hmaah an hriam tawk lo niin a lang.

A tlai lua...

Real khelh dan thlirin khel chhe lutuka chhuah erawh a rem lo a, an vanduai ṭum an tawng. Moscow khawpuiah 72% zet ball chang chungin vawi 26 shot an nei thei a, goal net tawn puar zo erawh a awm lo.

Lopetegui-a'n minute 58-naah Modric a luhtir a, Croatian midfielder hian Mariano Diaz tan hun duhawm siamsak mah se Lyon striker hlui hian hming chherna remchang a neihah post a tauh per.

Kroos-a'n a tihsual thup turin goal khungna hun ṭha a neih a chhawr thei lo a, hun pek belhah Raphael Varane chuan uiawm takin a tauh out a, Karim Benzema leh Casemiro ten woodwork an tih per bawk - Real an vanduai.

A êng lam thlirin...

Match thum ngawt Real an chak zo tawh lo a, anni ang club lian tan chuan mangan hun a ni tawh. Mahse, Real Madrid coach Julen Lopetegui erawh a in dawm kun duh lo a, a êng lam a thlir.

Spain coach hlui chuan, "Kan theihna zawng zawng kan pe a, kha kha kan tih theih chu a ni. Mahse, engtikniah emaw chuan goal kan khung leh ang a, kan chak leh em em ang," a ti.

Lopetegui chuan an hun ṭha neih an chhawr lo chu an chak loh chhan a nih thu sawi nghalin, "CSKA hi mahni muala khel an ni a, goal an khung hma avangin an vannei bawk. A pawi ber erawh kan chance neih kan chhawr lo kha a ni," tiin a sawi.

Dzeko hattrick

Real Madrid laka an tlawm hnuah Roma an insiamṭha a, season hmasa semifinalist hian Edin Dzeko hattrick hmangin Viktoria chu 5-0 ngawtin an sawp a, Cengiz Under leh Justin Kluivert ten an khung ve bawk.

Roma tana Champions League-a goal khung thei naupang ber ni nghal kum 19 mi Justin Kluivert chuan a goal khung hi a ṭhianpa, Ajax tana a khelhpui ṭhin, thluak fel lo avanga inkhel zui thei lo Appie Nouri tan a hlan.

Patrick Kluivert fapa hian a ṭhianpa hming chuanna jersey chu a keng chhuak a ni. Nouri hi nikum khan friendly match khelh a nih laiin nikhaw hre loin a tlu a, ngai a awh leh tawh lo.