Hopman Cup-ah Serena

Tennis season a la zo lo a, hetichung hian player ṭhenkhat chuan season bul an ṭanna tur an ti chiang ṭan leh der tawh. Serena Williams chuan December 29 aṭanga khelh tur Hopman Cup-ah a inlan tur thu a ti chiang.

Kum 37 mi Serena hi an ram United States tan a inlan dawn tihna a ni a, a hnampui Frances Tiafoe nen Roger Federer-a te ram Switzerland an hmachhawn ang. Inelna hi December thla tawpa neih ṭan tur a nih avangin kum tharniah pawh match an khel dawn tihna a ni.

Grand Slam vawi 23 champion tawh Serena chuan, "Australia chhim lama inkhelh hi chu nuam ka ti reng, he hmunah hian min ṭantu an tam em em a, ka tan chuan hun bul ṭan nana duhawm tak a ni," tiin a sawi.

World number 1 hlui Serena hi tun season chhungin a la inkhel leh dawn em tih a chiang lo a, US Open final-a Naomi Osaka a hneh loh hnuah match a la nei leh lo a ni. Season bul ṭan nana hman tur Hopman Cup-ah hian German star pahnih Angelique Kerber leh Alexander Zverev te pawh an inlan ang.