Salah chunga leng Mane ; Egypt ngamtu Senegal an champion

Africa Cup of Nations final-ah khawvel nghahhlelh Sadio Mane leh Mohamed Salah te an intawng ta ngei a, a tawpah Mane hlim takin a nui a, Salah erawh a mittui a tla thung.

Pathianni zan khan Africa Cup of Nations final-ah Senegal leh Egypt an intawng a, minute 120 chhunga goal a luh loh avangin penalty hmangin African champion tur chinfel a ni a, 4-2 in Senegal an chak.

AFCON-a la champion ngai lo Senegal a vawi khat nan an champion a, a vawi riat nana champion tum Egypt beiseina erawh a thamral ta.

Senegal coach Aliou Cisse chuan, "Theihtawp chhuah a, rim taka i thawh phawt chuan i duh chu pekin i awm ang, tih entirna ṭha tak a ni," a ti a, an thawhrim vanga champion an nih thu a sawi.

Salah hrilh ruk!
Senegal-in player an nei ṭha zawk a, goal nawr tur pawhin tlarhma an nei ṭha zawk - coach Cisse pawhin hei hi a hrechiang a, inkhel ṭantir phat aṭangin an nawr nghal a, Egypt erawh tlarhnungah nghet taka dingin counter attacking football chu innghah nan hman an tum thung.

Inkhel ṭan aṭanga minute lina lekah Egypt defender Mohamed Abdelmonem chuan Senegal left-back Saliou Ciss a tlawh thlu a, penalty a chawi. Penalty pet turin Mane a lo pen chhuak a, Salah-a hrilhruk Egypt keeper Gabaski chuan a dansak!

Mane a hawihai a, Salah-te an lawm thung - Liverpool forward Salah hi Senegal tlarhnung lamin an veng uluk a, ball a chan hlekin player pahnih velin an bawr nghal zel a, a che thei meuh lo.

Chawlhlawk hman hmain vawi hnih erawh chance a nei hram a, a pahnihna zawk Senegal keeper Edouard Mendy-a'n ṭha zeta a dansak chu uiawm tak a ni - Salah vanneih zan a ni lo a, chawlhlawk an hmang zui.

A tawpah Mane
Egypt-in hrem vanga khelmuala a naute ho thei lo, an coach Carlos Queiroz awm lo chu an tuar deuh niin a lang a, Senegal-in an duh ang takin chance mumal an insiam thei bik lo.

Extra time-ah erawh team pahnihin chak an tum tak tak tih a lang a, a hmuhnawm takzet - Ligue 1 club Marseille forward Bamba Dieng chuan extra time-ah hian chance vawi thum zet a nei a, mahse, Gabaski chuan ṭha takin a dansak vek!

Egypt lamin chance nei lo tawp an ni bik lo - Marwan Hamdy chuan hun tawp nan minute thum chauh a awm tawh tihah a khung teuh viau a, Senegal-in si ban nghak Mendy an neih avangin an vannei.

Penalty hmangin chak zawk zawn zui a ni a, Egypt tana Abdelmonem-a'n a hlah hnuah Bouna Sarr chuan Senegal tan hlah ve leh mah se a tawpah Egypt an vannei - Mohanad Lasheen penalty pet ṭha lo tak chu Mendy-a'n a dang a, Mane-a'n a tawp rawn kharin Senegal an champion.

AFCON Thlirna Tawi
Champion Senegal
Pahnihna Egypt
Pathumna Cameroon
Palina Burkina Faso
Top Scorer Vincent Aboubakar (8),
Cameroon
Best Player Sadio Mané, Senegal
Best Young Player Issa Kaboré, Burkina Faso
Best goalkeeper Édouard Mendy
Fair play award Senegal
* AFCON 2022 hi Cameroon-in an thleng
* January 9 - February 6, 2022 chhung khan ram 24-in khawpui panga (stadium paruk) ah an khel.

Senegal Champion Kalkawng
Group Stage
January 10, Thawhṭanni Zan
Senegal 1 - 0 Zimbabwe
SEN: Sadio Mane 90+7'

January 14, Zirtawpni Zan
Senegal 0 - 0 Guinea

January 18, Thawhlehni Zan
Malawi 0 - 0 Senegal

Round of 16 - January 25, Thawhlehni Zan
Senegal 2 - 0 Cape Verde
SEN: Sadio Mane 63'; Bamba Dieng 90+2'

Quarterfinal - January 30, Pathianni Zan
Senegal 3 - 1 Equatorial Guinea
SEN: Famara Diedhiou 28'; Cheikhou Kouyate 68'; Ismaila Sarr 79'
EQU: Jannick Buyla 57'

Semifinal - February 2, Nilaini Zan
Burkina Faso 1 - 3 Senegal
BUR: Blati Toure 82'
SEN: Abdou Diallo 70'; Idrissa Gueye 76'; Sadio Mane 87'

Final - February 6, Pathianni Zan
Senegal 0 - 0 Egypt
Penalty shootout-ah Senegal 4-2 in an chak

Penalty Pet Dan
Senegal Egypt
Koulibaly G Zizo G
Diallo G Abdelmonem X
Sarr X Hamdi G
Dieng G Lasheen X
Mane G