China nulate an thiam ber

AFC Women’s Asian Cup chu China nulaten an chawi ta. Pathianni zan final inkhelah China hian South Korea chu 3-2 in an hneh a, a vawi kua nan an champion.

DY Patil Stadium, Navi Mumbai-a inkhelah South Korea lamin Choe Yu-ri leh Ji So-jun te hmangin chawlhlawk hmain goal hnih an khung a, champion turin an dinhmun pawh a ṭha hman hle.

Mahse, second half-ah China lamin Jiali Tang-i penalty hmangin si phurh an sut ṭan. Linyan Zhang hmanga a sut zawh hnuah, hun tawp hma chiahin Xiao Yuyi chuan chakna leh champion-na goal a khung.

Asian Cup-a semifinal thleng chin ram pali - China, South Korea, Japan leh Philippines te chu 2023 FIFA World Cup khel turin an tling nghal. Inelna thlengtu India erawh player leh staff zinga hripui kai an awm avangin a tir lamah an inhnukdawk.

Tournament hi India tan mellung pawimawh a ni. India ramah a vawi khat nan Video Assistant Referee (VAR) hman a ni a, knockout stage chinah an hmang. Asian Cup bikah pawh VAR an vawi khat hmanna a ni bawk.