Liverpool an tlang; champion lai Foxes an tla

Pathianni zan FA Cup fourth round inkhelah Liverpool an chak a, champion lai Leicester City an tla thung. Reds hian an mikhual Cardiff City chu 3-1 in an hneh a, Diogo Jota, Takumi Minamino leh Harvey Elliott ten goal khat ṭheuh an khung a, fifth round an inpetkai.

Champion lai Leicester an mualpho a, Championship club Nottingham Forest chuan 4-1 ngawtin an sawp. Foxes coach Brendan Rodgers chuan, "Ka player-te hi darthlalangah in en se la, he hmuna cham zel turin an ṭha tawk tih pholang rawh se," a ti zui a, nipui transfer-ah player a hralh nual hmel.

Non-league club Boreham Wood chuan knockout tournament ropuina min hmuhtir a, Championship club Bournemouth chu 1-0 in an pet chhuak - kum 37 mi Mark Ricketts chuan inkhela goal awmchhun hi a khung.

Liverpool tan lawmna
An chhuanvawr pahnih Mohamed Salah leh Sadio Mane te AFCON final-a intawng tura an inbuatsaih lai khan Reds-in FA Cup an lo khel ve thung a, Jurgen Klopp-a'n team ṭha tak a remkhawm chungin an mikhual Cardiff lakah first half chhungin goal an khung lo.

Mahse, second half-ah Reds tak tak an inlar a, goal thum an khung - Diogo Jota chuan Trent Alexander-Arnold-a freekick aṭanga ball kal chu minute 53-naah a tauh lut a, Japanese forward Minamino chuan Liverpool tana a match 50-na chu minute 68-naah goal hmangin a lawm bawk.

Liverpool lawmna belhchhah turin Harvey Elliot chuan minute 76-naah an goal thumna a khung ve leh a, September-a hliam vanga a chawlh reng hnua a kir lehna hmasa berah goal a khung nghal. Cardiff tan Rubin Colwill chuan minute 80-naah si phurh rawn sut ṭhen mah se a team kaih harh nan a tlai hret tawh. Reds tan hian FC Porto aṭanga an lakluh thar Luis Diaz pawh second half-ah a inlan.

Foxes an mualpho
Championship-a pariatna ni mek Nottingham Forest khelmualah Leicester an lenglut a, mualphoin an haw - Forest hian minute 23-naah team work ṭha pholangin Philip Zinckernagel hmangin goal hmahruai an khung a, Foxes an hawihai.

Mahse, hei hi Forest tawpna a ni lo - second 30 pawh a liam hmain Foxes defender James Justin ball pek sual zarzotu Johnson chuan an goal hnihna a khung a, minute riat hnuah captain Joe Worrall chuan a belhchhah leh bawk - minute 35 hmain 3-0 a ni der.

Forest goalkeeper Brice Samba tihsual zarzoin Kelechi Iheanacho chuan Foxes beiseina siam ve leh mah se mualneitu team tan Djed Spence chuan minute 61-naah a khung leh a, Forest-in ropui taka hnehna changin champion lai an pet chhuak.

February 6, Pathianni Zan
Liverpool 3 - 1 Cardiff City
LIV: Diogo Jota 53'; Takumi Minamino 68'; Harvey Elliott 76'
CAR: Rubin Colwill 80'

Nottingham Forest 4 - 1 Leicester City
NOT: Philip Zinckernagel 23'; Brennan Johnson 24'; Joe Worrall 32'; Djed Spence 61'
LEI: Kelechi Iheanacho 40'

AFC Bournemouth 0 - 1 Boreham Wood
BOR: Mark Ricketts 38'