Barcelona inkhel a mawi leh ta ; A tuartu chu Atletico Madrid

Xavi-a hi Pep Guardiola enkawlna hnuaia lo vul tawh kha a ni a, tunah chuan Xavi hnuaiah Barcelona player chhuak tharte an vul ngei dawn tia sawi ngam a ni ta. Catalan club hian inkhel hmuhnawm chhawp chhuak chungin Atletico Madrid chu 4-2 in an hneh.

Pathianni zan La Liga inkhel dangah hmahruaitu Real Madrid an chak hram. Real hian hun tawp dawn lama Marco Asensio goal mawi hmangin Granada 1-0 in an hneh a, pahnihna Sevilla aiin point rukin an sang fal zawk.

Nou Camp boruak
Hripui leng vangin season hnih vel chu stadium khata mipui pungkhawm hmuh tur an awm ta meuh lo. Tunah chuan Nou Camp khat tlatin fans an pungkhawm leh ta, an thawm chu mitdelte hriattham khawpa ring a ni leh ta hem hem mai.

An duh loha an hnawl hnu Luis Suarez ngei mai khan Atletico tan goal a thawk chhuak. Fans awm chunga a kir lehna hmasa berah Uruguay international hian Yannick Carrasco goal khung tur a siamsak, minute riatna lekah mikhual lamin hma an hruai.

Barcelona manager Xavi-a'n, "Tun hnai kum 30 chhung velah chuan Suarez leh Samuel Eto'o kha centre forward kan neih ṭhat ber an ni," tiin inkhelh hmain a sawi lawk a, an player hlui hi kum 35 mi ni tawh mah se a la hlauhawm hle.

Barca an inlar
"Atletico an ṭhat lai ber a ni lo," tiin Xavi-a'n a sawi lawk a, mahse si an phur hmasa si. Amaherawhchu, goal hmasa ber hi Barcelona theihna sawr chhuaktu mai a ni. Dani Alves-a ball siamsak chu Jordi Alba-a'n boruaka ball a kan laiin a hlai lut, keeper ṭha Jan Oblak tan meuh pawh dan theih a ni lo.

Gerard Pique-a ball tauhin bar a per a, a lo let lam hi Ronald Araujo chuan hnai takah a khung. Gavi-a ball cross chu ball pet thiam Alves hma zawnah kher a kal a, Brazilian defender hian a nuam tih dan tak petin an goal lina a khung.

Suarez-a'n hnai taka tauh lutin champion lai Atletico tan beiseina a siam, ṭul lo taka Carrasco tlawhtu Alves hnawh chhuah a nih avangin Diego Simeone naute an phur thar; mahse hun tawp lam minute 20 chhung chu tlem zawk ni chungin Barca an ṭang tluan.

Hmalam an pan
Xavi-a'n nikum November thla khan Barcelona hi a enkawl ṭan, khatih lai khan Catalan club hi Atletico aiin point rukin an hniam zawk - tumah erawh Barca hian point hnihin an kalsan. Champions League khelh phakna hmun aṭangin an nek chhuak.

Spanish manager Xavi-a'n a player lak hmasa ber Alves hi January thla aṭangin a chhawr ṭan a, a kum tam deuh tawh mah se goal khung leh a venhim kawngah a la thawhhlawk a, player naupang zawkte ho khawmtu a nih bawk avangin an la sual lo hle.

Player thar Adama Traore-a'n assist a nei nghal a, Gavi khung tur a siamsak bakah Alaba goal a luh dawnin tha a thawh. Ferran Torres leh Pierre-Emerick Aubameyang te pawhin Xavi duh dana an khel thei a nih chuan an hmuhnawm lehzual ang.

Champion zia
Real Madrid-in an player pawimawh pali an chhawr thei lo, an zingah hian striker Karim Benzema (17 goals) leh Vinicius Jr (12) te an tel. La Liga hmahruaitu hian inkhelh dawnah Casemiro leh Lucas Vazquez te chu pum na vangin an telh thei lo bawk.

Carlo Ancelotti naute tan Granada tlarhnung sut hawn a harsa hle, mahse champion tura hmalam pan an nih avangin dan reng theih an ni lo. Minute 74-naah Marco Asensio chuan box pawn aṭangin mawi zetin goal awmchhun a khung.

Italian manager Ancelotti-a'n Gareth Bale leh Eden Hazard chungah rinna a nghat ngam lo. Hazard erawh bench aṭanga luhtir a ni hram a, penalty hlawh chhuak turah inngai mah se an pe lo, a ball cross per zel chu hnai takah Asensio-a'n a hlah bawk.