Juventus chakna player thar pahnih

Juventus chuan thlasik bazar an hmang fuh viau dawn niin a lang. An player lei thar pahnih Dusan Vlahovic leh Denis Zakaria te goal hmangin Hellas Verona chu 2-0 in an hneh a, season thara Champions League khel phak chinah an inhlangkai.

Pathianni zan Serie A inkhelhah Juventus an phur. Allianz Stadium-a inkhel entuten Fiorentina aṭanga an lak thar Vlahovic chu tarmawi nen an lo lawm. A goal hmasa ber khung tur pawhin a nghak rei lo hle.

Minute 13-na lekah Paulo Dybala hnen aṭanga a through ball ṭha tak hmuh chu a khung, chak taka a tlan bakah keeper Lorenzo Montipo chu tawih zetin a chip khum. Second half-ah Zakaria chuan an goal hnihna leh chak nemnghehna a khung ve bawk.

Serbian striker Vlahovic-a'n Serie A season kal laiah goal 18 a khung ta a, Lazio striker Ciro Immobile nen an khung zat a inang; anni pahnih aia khung hnem an awm lo. Verona lakah hian goal khung theihna remchang dang pahnih a neih erawh a chhawr thei ta bik lo.

Juventus hian hrem vangin Manuel Locatelli an chhawr thei lo, hliam vangin Federico Bernardeschi, Alex Sandro leh Federico Chiesa te an chawl mek bawk. Harsatna an tawh lai takin player thar pahnih hmangin point an sual chhuak.

Old Lady manager Massimiliano Allegri chuan, "Hellas Verona kha an tlan tam em em a, khatiang team hmachhawn kha chu a awlsam ngai lo. Chutih rualin kan naute khan an khel ṭha em em thung," a ti.

Allegri naute hian Ningani zanah Sassuolo nen Coppa Italia quarterfinal an khel dawn a, kar tawpah UCL khelhna an chuh pui Atalanta nen an intawn zui dawn avangin an hmabak a hautak dawn - tun thla chawhnu lamah UCL last 16 an khel bawk ang.

Italy - Serie A
Atalanta 1 - 2 Cagliari
Bologna 0 - 0 Empoli
Sampdoria 4 - 0 Sassuolo
Venezia 0 - 2 Napoli
Udinese 2 - 0 Torino
Juventus 2 - 0 Verona