Messi hoin PSG chak nuamsa

Lionel Messi-a'n kumina a goal hmasa ber a khung a, a club Paris St-Germain chu Lille lakah 5-1 a hnehna chanpuiin Ligue 1 hmahruaitu an nihna an sawhnghet. Paris club hian Marseille lakah point 13 zetin hma an hruai fal.

PSG tan Danilo-a'n goal a khung hmasa ber, a siamsaktu chu Messi a ni. Danilo hian goal hnih a khung bakah - Messi, Presnel Kimpembe leh Kylian Mbappe ten goal khat ṭheuh an khung bawk. Lille tana Sven Botman khungin kawngro a su phak lo.

Barcelona captain hlui Messi-a'n Paris club tan league match 13 a khelh aṭangin goal hnih a khung ta a, kum 2005 aṭanga khan kum tin goal a la khung ziah. Champions League-ah erawh match nga aṭangin goal nga a khung thung.

PSG manager Mauricio Pochettino chuan, "A pumpui thlir kha chuan lawmna tur deuh hlir a ni, ka naute an khelh ṭhat em avangin ka lawm. Hmasawnna tur lai erawh a la awm, season chawhma lam aia ṭha zawkin khelh zel kan tum ang," a ti.

Season hmasa khan PSG hian Ligue 1 nomawi chu Lille lakah hian an chan, kuminah hian laklet ngei an tum - an neih let pawh a rinawm. League bakah Champions League champion nih an tum ang.

February 15, Thawhlehni zanah UCL last 16 first leg khel turin Real Madrid an mikhual dawn. Spanish club lakah hian forward Neymar an chhawr thei hman dawn em tih a la chiang lo. Brazilian star hi hliam vangin a chawl mek a ni.