Leverkusen-in Dortmund an sawp

Bayer Leverkusen-in Pathianni zan khan Signal Iduna Park an luhchhuah a, mualneitu Borussia Dortmund 7-2 in an sawp. Marco Rose kaihhruai Dortmund hi pahnihnaah awm chhunzawm mah se hmahruaitu Bayern Munich an phak lohna chu point kua zet a ni.

Dortmund-in bul an ṭan ṭha lo a, minute 10-na lekah Bayer Leverkusen pressure nat vangin Dan-Axel Zagadou-a'n an khingpui striker Patrik Schick a pass. Czech striker hian goal-ah petin Dortmund keeper Gregor Kobel-a'n dang mah se Manuel Akanji-a'n an lamah a su goal.

Leverkusen defender Jeremie Frimpong-a'n minute 16-naah an lamah tauh lut palh mah se German rawlthar duhawm Florian Wirtz hmangin minute 20-naah mikhual team-in hma an hruai lehnghal. Leverkusen midfielder Robert Andrich-a'n freekick aṭangin minute 28-naah a khung belh.

Second half-ah mikhual team bawkin bul an ṭan ṭha a, Leverkusen defender Jonathan Tah-a'n minute 53-naah corner aṭanga ball kal chu a volley goal ṭha hle. Dortmund-in goal beiseiin an nawr a, amaherwhchu Leverkusen-in counter attack hmang ṭangkaiin minute 87-naah Moussa Diaby-a'n goal ngana a khung.

Dortmund-in minute 89-naah substi-tute Steffen Tigges hmangin siphurh an sut ṭhen a, an mualphona an hliahkhuh zo lo, an mualah 5-2 in an tlawm. Chutihrualin Marco Rose-a hoten goal nga ngawt chhuah mah se hun tawp thlengin an khingpui an nawr thei a, an player pawimawh Erling Braut Haaland chu inhiam vangin an chhawr thei lo bawk.