Newcastle mualah Lampard-a 'Everton'
Zanin aṭangin Premier League inkhel hmuhnawm thlir tur a awm dawn. January transfer vang leh manager thar vangin zanin dar 1:15-a Newcastle United leh Everton inkhel tur en a châkawm hle. West Ham-in zanin dar 1:15-ah tho hian relegation zone-a awm Watford an hmachhawn ang.
Everton thar
Everton-in Premier League history-a player ropui ber zinga mi Frank Lampard an lalut a, Toffees chanchinin ngaihven a hlawh nghal. English manager Lampard-a kaihhruaina hnuaiah Everton-in FA Cup-ah Brentford 4-1 an sawp a, Goodison Park-ah hlimna a thleng.
Toffees hi an khel ṭha a, an goal chhuah chhun pawh penalty aṭangin a ni. Goal khungtu zingah Richarlison leh Andros Townsend te an tel a, defender Ben Godfrey inhliam mah se English defender aia lut Yerry Mina-a'n goal a venhim bakah a tauh goal.
Everton-in Bees an hmachhawn ṭumin an player thar Dele Alli leh Donny van de Beek te an phochhuak a, player talent nei ṭha pahnih hi Magpies an hmachhawn hunah chuan squad-ah a awm thei tawh ang.
Toffees striker chhuanvawr Dominic Calvert-Lewin pawh training-naah inhliam deuh mah se chhawr theih a beiseiawm. English striker Calvert-Lewin hian inhliam vangin match ruk chauh a la khel a, goal thum a khung tho. Rafael Benitez-a hnuaia Everton chet ṭhat tawk lo chhanah player pawimawh inhliam a puh theih.
Newcastle ve thung
January transfer-ah Newcastle United-in player panga lak nan pound maktaduai 90 bawr vel an hmang a, Everton ang thoin Eddie Howe hnuaiah an inthuam thar nasa hle. Magpies hian player thar right back Kieran Trippier leh striker Chris Wood te an chhawr tawh.
Chutihrualin FA Cup aṭanga an tlak tawh avangin Everton nena an inkhel tur hi January 22 hnua an match hmasa ber tur a ni dawn. Player thar left back Matt Targett, centre back Dan Burn leh midfielder Bruno Guimaraes ten bul an ṭan vek thei bawk.
Magpies hi table-ah 19-naah an awm mek a, point 15 chiah an la hmu. Chutihrualin an khingpui tur Everton pawh hian point 19 chiah an la hmu a, relegation battle-ah an tel. St James Park-a inkhelh tur a nih avangin Newcastle tan hun ṭhaah a ngaih theih a, chutihrualin an khingpui tur hi Lampard hnuaia phur thar Toffees an nih avangin point thum hlawhchhuah erawh a harsa dawn.
Hammers hmaah Hornets
Season thara Champions League khelh tum West Ham United-in an mualah relegation zone-a awm Watford an mikhual dawn a, inkhel awmze nei hmuh tur a awm loh pawhin inkhel hmuhnawm thlir tur a awm ang. Watford hian manager thar Roy Hodgson hnuaiah kartawp khan Burnley an hmachhawn a, goal awm loin an inhnehtawk.
Watford-in tun season-a a vawi khat nan clean sheet an nei a, team ṭha zawka ngaih West Ham lakah Hodgson-a hoten goal venhim hna an thawk ang. Hammers hian FA Cup-ah Kidderminster Harriers chu extra time-ah 2-1 in an hneh hram a, Watford laka chak an duh a nih chuan tlarhma lam an hriam hret a ṭul dawn.
Zanin Inkhel Tur
Newcastle United 1:15 AM Everton
West Ham 1:15 AM Watford
Burnley 1:30 AM Manchester United
February 9, Nilaini
Norwich City 1:15 AM Crystal Palace
Tottenham 1:15 AM Southampton
Manchester City 1:15 AM Brentford
Aston Villa 1:30 AM Leeds United
February 10, Ningani zan
Liverpool 1:15 AM Leicester City
Wolves 1:15 AM Arsenal