FIFA Club World Cup ; Chelsea khingpui tur Al Hilal

FIFA Club World Cup-ah Al Hilal-in inelna thlengtu United Arab Emirates club Al Jazira 6-1 in an sawp. Asian champion hian semifinal-ah European champion Chelsea an hmachawn dawn a, February 9, Nilaini zan dar 10:00-ah an inkhel ang. Zanin dar 10:00 hian semifinal hmasa zawkah South American champion Palmeiras leh African champion Al Ahly te an inkhel ang.

Al Hilal an chungchung
Saudi club Al Hilal hi 2021 AFC Champions League champion an ni a, nikum November thla khan final-ah South Korean club ṭha Pohang Steelers 2-0 in an hneh. Club World Cup-ah pawh Al Hilal-in bul an ṭan ṭha a, Oceania aiawh AS Pirae sawptu Al Jazira an sawp ve thung.

UAE club Al Jazira hi UAE Pro League champion lai an ni a, Asian champion hmaah erawh an zawr. Al Jazira hian Abdoulay Diaby hmangin minute 14-naah khung hmasa mah se Saudi club-in Odion Ighalo, Matheus Pereira , Mohamed Kanno, Salem Al-Dawsari, Moussa Marega leh Andre Carrillo te hmangin an chhanglet.

Al Hilal goal hmahruai khungtu Odion Ighalo hi Manchester United tan pawha loan hmanga khel tawh a ni a, goal hnihnna khungtu Brazilian midfielder Matheus Pereira hi season liam ta khan Premier League club West Brom tan match 33 la khel thei an ni. Chutihrualin Chelsea tan chuan awlsam taka hneh theih tura ngaih a ni a, Al Hilal tan Premier League club hneh turin thilmak a thlen a ṭul ang.

Semifinal hmasa zawk
Eygptian club Al Ahly-in second round-ah mak takin Mexican club Monterrey an hneh a, Copa Libertadores champion Palmeiras an hmachhawn theih phah. Brazilian club Palmeiras hian nikuma neih Club World Cup-ah khan semifinal-ah Mexican club UANL lakah an chesual.

Brazilian club hian kum 2020 aṭanga neih ṭan Club World Cup-ah sulhnu ṭha tak a nei a; Corinthians vawi hnih an champion tawh bakah Sao Paulo leh Internacional te vawi khat ve ve an champion tawh bawk. Chutihrualin Brazilian club hi Brazil-a inelna neih a nih chauhin an champion.

Palmeiras hian nomawi an la chawi ve lo a, inelna hnuhnung berah pawh hian pathumna inchuhnaah zanina an hmachhawn tur Al Ahly nen goal awm loa an inhnehtawk hnuin penalty shootout-ah a chak lo. Hemi a nih avang hian Brazilian club hi Egyptian club laka chak chiang saa dah a rem lo.

First Round - February 3, Ningani
Al Jazira 4 - 1 AS Pirae
ALJ : Zayed Al-Ameri 5'; Ahmed Al-Attas 25'; Milos Kosanovic 41'; Abdoulay Diaby 63'
ASP : M'hammed Rabii Rabii 48' (OG)

Second Round
February 5, Inrinni
Al Ahly 1 - 0 Monterrey
ALA : Mohamed Hany 53'
February 5, Pathianni
Al Hilal 6 - 1 Al Jazira
AlH : Odion Ighalo 36'; Matheus Pereira 40'; Mohamed Kanno 57'; Salem Al-Dawsari 77'; Moussa Marega 88'; Andre Carrillo 90+2' (pen.)
AlJ : Abdoulay Diaby 14'

Semifinal
Zanin Inkhel Tur
Palmeiras 10:00 PM Al Ahly
February 9, Nilaini
Al Hilal 10:00 PM Chelsea
Third Place : February 12,
Inrinni (6:30 PM)
Final : February 12,
Inrinni (10:00 PM)