Mumbai tana a changtupa Lianzuala
Pathianni zan Indian Super League inkhelah Mumbai City chuan 1-0 in Chennaiyin FC an hneh a, Mumbai forward Lallianzuala Chhangte chu hero of the match atan thlan a ni.
Mumbai tan Vikram Pratap Singh chuan inkhela goal awmchhun hi minute 85-naah a khung a, mahse, goal khungtu aiin a club hlui hmachhawntu Lianzuala chanchinin sawi a hlawh zawk.
Lianzuala a hmuhnawm a, Lunglei tlangval chuan, "Kum hnih leh a chanve ka lo khelh tawhna hmachhawn ka ni a, engtiklai pawha theihtawp chhuah ṭhin ni mah ila ṭum dang ai chuan ka ṭang lehzualin ka hria," tiin Vanglaini a hrilh.
Chennai to Mumbai
LZ-a'n beisei angin tun season-ah Chennaiyin tan hmun a chang tam tawk lo a, hetihlai hian Mumbai chuan an elpui club player hi lakluh duhin an lo dawr ve reng bawk.
Mizo forward chuan, "Chennaiyin lamah coach-in khelh dan phung a thlak a, hetihlai hian Mumbai-in min lakluh ngei duhin min dawr ve reng bawk. AFC Champions League an lo khel dawn bawk nen, ka zawm ta a ni," tiin Vanglaini a hrilh a, a tisual lo.
Lianzuala hi match hmasa berah training a la nei tam hman lo chungin bench aṭanga luhtir a ni a, match hnihnaah meuh chuan bul a ṭan a, hero of the match a ni - match sarih zet a zawna an chak zawh tawh loh hnuah Mumbai an chak a, semifinal beiseina a nung thar ta bawk.
A changtupa chu
LZ-a'n goal khung lo mah se Chennaiyin tlarhnung tan chuan mangchhia a ni. India international hian ama insiam chawp hmangin chance duhawm nei mah se Debjit Majumder chuan a dansak a, a freekick pawh Indian keeper tawnhriat nei ṭha hian a dansak bawk.
Hei chauh a ni lo - Lianzuala hian ṭha taka ball lalutin Igor Angulo tan duhthusama goal khung theihna hun ṭha a siamsak a, mahse, Athletic Bilbao striker hlui hian a chhawr tlat lo.
Vikram-a goal khung pawh Lianzuala thawhchhuah tho a ni -Brad Inman tan a siamsak a, Australian attacking midfielder hian shot nghal mah se Chennaiyin lamin an dang hman a, a per aṭanga ball kal zel chu Vikram hian goal-ah a chantir.
Pathian vang
Mumbai tan Lalengmawia (Apuia) chuan inkhel bul a ṭan bawk a, Vaivakawn rawlthar hian long range shot hmangin uiawm takin a khung lo. Chennaiyin lamah Jerry Lalrinzuala a inlan bawk.
Lianzuala chuan, "Hero of the match atan thlan ka ni a, ka rilrua lo awm hmasa ber chu engkim hi Pathian vang a ni tih hi a ni. Beidawng loa amah kan belh tlat chuan a hun takah min khai chhuak leh ṭhin a, a ruahmanna hi a ṭha em em vek a ni," tiin Vanglaini a hrilh a, tun season ISL-ah vawi hnih hero of the match a ni tawh.
Kum 24 mi forward hian tun season ISL-ah match 14 khel mah se minute 751 chiah khelmualah hun a la hmang. Goal khat a khung a, assist vawi khat a nei - ISL-a season ruk a khelhna niin match 92 a khel a, goal 20 khungin assist vawi ruk a nei thei a ni.