Chanmari FC-in Police tlansan
Mc Dowell's No. 1 Soda Mizoram Premier League Season 7-ah vawi hnih champion tawh Chanmari FC chuan nimin khan Mizoram Police 1-0 in an hneh a, goal awm chhun hi Mark Zothanpuia'n freekick aṭanga a khung a ni.
Chanmari hian point thum hlu tak an hlawhchhuah avangin point 10 hmuin pathumna an ni a, Police erawh match rukah point ruk hmuin table-ah paruknaah an awm.
Police thar
Mizoram Police-in hrem vangin player pariat ngawt an chhawr thei lo a, hrem zingah hian season liam ta top scorer Lalfakzuala pawh a tel a; coach Lalbiaksanga Colney leh assistant coach Zosangliana Ralte te hrem a nih bawk avangin technical area-ah an awm thei lo.
Amaherawhchu, Police-in player hrem an ngah avangin training nei la, player ṭha an lakchhuah theih phah a. Chanmari FC nen best player ni lai R. Malsawmtluanga leh best keeper nilai F. Lalmuanawma bakah Lalruatpuia, Ronald Zothanzama, Lalhmunmawia, Lalrinzuala Khiangte leh Lalbiakhlua (Hlutea) te chu bul ṭantu zingah telin an ṭha sawt loh pawhin Police thar chu an ni chiang.
A nung tawk lo
Mizoram Police-in bul an ṭan ṭha a, tawnhriat leh theihna an nei sang tih a lang. Mahse an inkhelh rei hnuah erawh match fitness an nei lo tih a lang a, training nei ṭha zawk Chanmari an insiamṭha rang hle.
Chanmari tan Lalmuanzova chuan chance ṭha a nei mah se inrintawkna a neih loh avangin goal zawnah a pet lo a, Laldampuia pawhin Lalnunzama siam sak chu keeper Muanawma dan tur bakin a pet thei lo. Police pawhin chance ṭha an insiam thei lo a, F. Lalrinpuia'n a hun ṭha neih chu goal zawnah a tauh thei lo.
Danglamna freekick
Second half-ah inkhel a danglam tam lo a, minute 55-naah Chanmari FC-in goal an khung. Muanzova freekick hlawhchhuh chu Mark-a'n petin goal kilah tak a pe a, Police keeper Muanawma'n a en liam. Serchhip tlangval Mark hi man of the match-ah thlan a ni a, an khuaa round 7 khelh a nih hunah inrintawkna a ngah sawt sang.
Chanmari an chungnung hret a, Police keeper Muanawma'n ṭha zetin Jeremy Laldinpuia leh Dampuia te goal khung tur a dan sak. Hun tawpah erawh goal mamawh zawk Police-in Chanmari an nawr bet a, Lalruatliana Sailo hote an talbuai hle.
Police winger Lalbiakhlua'n (Biaktea) keeper MS Dawngliana chiah a hmachhawn hnuah a khung thei lo a, substitute Lalfakawma'n keeper tih per chang fuh mah se goal khung nan a hmang thei lo. Police midfielder MS-a'n MPL ball thar Nivia Antrix a la hrethiam tawk lo tih a lang a, training tam zawk chu nei thei se Darlawn tlangval ball pet thiam hian freekick aṭangin ball hlauhawm zawk a pet thei ang.
Chhuanlam siam lo
Mizoram Police manager B. Lalneihsanga chuan, "Kan player-te hrem awm nual mah se kan hotute zarah kan tuar lo a, player rawn zawm tharte practice an nei hman lo chungin an khel ṭha em em a ni. Tuna kan dinhmunah hian hlauhthawnna kan nei lo a, Serchhip-ah result ṭha zawk kan neih ngei ka beisei," tiin Vanglaini a hrilh.
Police hian Serchhip-ah kaithar Chawnpui FC an hmachhawn dawn a, Chanmari FC hian champion lai Chhinga Veng FC an hmachhawn thung ang.