Chawnpui lakah Aizawl FC fiahin awm dawn

Aizawl FC-in Mizoram Premier League an champion hnuhnun ber chu kum 2015 daih a ni tawh a, I League club hian kum thum hnuah an champion thei ang em tih chu zawhna a ni a, tunah rih chuan nomawi chawi tur em chuan an la khel ṭha tawk lo tih chu a chhanna a ni rih.

Zanin dar 7:00 hian Aizawl FC hian kai thar Chawnpui FC an hmachhawn dawn a, tun dinhmunah chuan an budget inthlauhna aiin table-a an inthlauhna point hnih aṭanga khaikhin a fuh zawk ang.

Thanga Vs Gurpreet

MPL7-ah Nivia Antrix hman a ni a, ball zâng leh thawk chak tak hi dead ball specialist te vanneihna a ni a. Chawnpui midfielder Vanlalthanga chuan freekick

aṭangin goal thum a khung der tawh a, Hualngohmun tlangval hi MPL kaithar goal nawr kawngah a ṭangkai hle.

Aizawl FC tan Thanga dan theih dan chu freekick chawi tlem a ni a, referee thutluknaa innghat a tam avangin goalkeeper Gurpreet Singh a pawimawh dawn. Punjabi keeper Gurpreet hi a rintlak a, Chawnpui lakah hna tam nei tur niin lang lo mah se minute 90 chhung a fimkhur reng a ṭul ang.

Chawnpui an zam lo

Chawnpui FC coach Laldinthara chuan, "Aizawl FC an nih avangin kan zia hloh kan tum lo a, ṭum danga kan tih dan ang thoin remchang a awm chuan goal kan nawr ngam ang. Point thum hlawhchuah kan tum dawn," tiin Vanglaini a hrilh.

MPL thar hian defender Lalhlimpuia hliam vangin an chhawr thei dawn lo a, amaherawhchu captain Lalthlamuana kawppui turin Lalruatfela a awm tho avangin an buai phah lo ang. Tlarhma lamah MPL hmasa bera FC RS Annexe tana khel tawh winger Zarzokima an la lut bawk a, Dawrpui Vengthar tlangval hi mamawh dan a zira luhtir theih a ni ang.

AFC hi...

Aizawl FC coach Gift Raikhan chuan, "Chawnpui hi team hriatthiam har tak an ni a, kan fimkhur a ngai ang. Squad chhah ṭha tak kan nei a, player-te hian khelhna hun a nei zel dawn, chumi tur chuan an inring a ṭul a ni," tiin a player-te chu inkhel tura inpeih vek turin hrilh.

I League club hian Kyrgyzstan midfielder Bektur Talgat Uulu leh Liberian forward Ansumana Kromah te an lalut thar a, zaninah erawh chhawr theih an la ni dawn lo. Kar leh lama Serchhip-a round 7 khelh hunah erawh an khelh theih beisei a ni.