Tlai lamah BVT leh Ramhlun North

MPL7-ah Bethlehem Vengthlang leh Ramhlun North ten chak hmel an hmu lo a, table mawngphaha awm pahnih hi tlai dar 3:00 hian Lammualah an inkhel dawn.

BVT leh Ramhlun North hian point khat ve ve chauh an la hmuh avangin inkhel en châkawm tur niin a lang lo a, amaherawhchu ngaihtuah chian erawh chuan a hmuhnawm ngei tur a ni.

Ramhlun North point hmuh tlem chhan hi an ṭhatna anga an khelh chhuah loh vang a ni a, insiamṭhat tumin coaching staff an insiksawi ṭan a. Foreigner thar pahnih midfielder John Ampong leh striker Bamba Musah ten training-na hun tam zawk an nei tawh a, an goal nawr a na sawt tura ngaih a ni.

Club secretary K. Lalenghluna (Maenga) chuan, "Tun hi insiamṭhatna hun ṭha a ni a, BVT lakah hian point thum hmuh ngei a ṭul a ni," tiin chak an mamawh thu a sawi.

Amaherawhchu, Ramhlun North hi an beisei ang ngawt chuan chak a awlsam dawn lo, BVT hian Chhinga Veng aṭangin Lalchhuanpuia an lalut tawh a, a club hlui a hmachhawn thei dawn. Midfielder ChP-a bakah hian Germany-a football zir tawh Durtlang striker Lalmuanzova an neih belh bawk.

BVT coach Lalhlimpuia chuan, "Chak kan duh dan a la ngai reng a, chumi tur chuan squad pawh kan inthuam chak a ni. Muanzova hi Jeje ang maia chak ṭha a ni a, ChP-a kan chang thei kan vannei hle. Tunah chuan vengchhung mipui ṭawiawmna ṭha kan mamawh tak meuh meuh a, Lammuala kan inkhel en turin BVT mipui kan sawm," tiin a sawi.

MPL5 best defender Hlima hi a dam tawh a, tlarhnung tichak turin a inlan dawn. Defender tawnhriat nei ṭha Hlima hi Jonathan H. Lalhriatkima nen an inkawp dawn tihna a ni a, tlarhnung tichak tura ChP-a a awm bawk avangin Ramhlun North foreigner te nena an inhmachhawn tur hi a hmuhnawm khawp ang.