Dortmund an chak tluang zel

Jadon Sancho chuan tun season chhunga a vawi ruk nan a ṭhiante goal khung tur a siam sak a, English rawlthar duhawm hian Nilaini zan khan Borussia Dortmund chu an mikhual AS Monaco lakah 3-0 in hnehna a chanpui - Bun­desliga hmahruaitu hian Champions League match hnih an khelh tawhah point ruk an hmu.

Group A inkhel pakhat zawkah Atletico Madrid tan Antoine Griezmann chuan goal hnih khungin Club Brugge 3-1 in an hneh ve bawk a, Spanish club leh Dortmund te hi an point hmuh a inzat - anni pahnih hi knock out lut chiang tura ngaih an ni tawh a, an intawn hunah hmahruaitu tur zawk an chinfel a ngai ang.

Dortmund an tluang

Signal Iduna Park-ah Dortmund hi chak zawk tura ngaih an ni a, mahse hun chanve hma lamah goal an khung thei bik lo. Minute 51-naah Sancho chuan Monaco player pahnih inkarah ṭha zeta lir lutin Jacob Bruun Larsen goal khung tur a siamsak.

Paco Alcacer-a'n penalty hlah mah se a hnuah an goal hnihna a khung tho a, hun tawp hma chiahin tun season hmang ṭha tak Marco Reus chuan chak nemnghehna leh goal thumna ni bawk a khung. Monaco lam tan captain Radamel Falcao-a'n hun ṭha nei mah se keeper Roman Buerki a paltlang zo lo.

Chak thei lo Brugge

Belgian champion ni chungin Brugge-in Champions League an khel a, European club inelna sang berah hian a zawnin match riat chhung an tlawm ta. An mikhualna ramah Griezmann an ngam lo, Atletico Madrid forward hian goal hnih a khung bakah Koke khung tur a siamsak bawk.

France international Griez­mann hi Atletico Madrid-in UCL bika goal an khung hnu­hnung 20 zinga 18-ah a inrawlh ta, goal 13 a khung bakah a ṭhiante khung tur ṭum nga a siamsak - player pawi­mawh ber chu a ni chiang.