Liverpool an zuai; Napoli lakah an tlawm

Match thum ngawt chu Liverpool-in chak hmel an hmu ta lo. Nilaini zan khan Champions League group stage match-ah Napoli an lenchilh a, 1-0 in an tlawm.

'Dang tu' awm lo ang maia Liverpool kal fawr a zuai ṭan a, match sarih zet a zawna chak team kha match thum chhung a zawna chak zo lo an ni ta. Reds boss Jurgen Klopp chuan, "Keimahni lo chu dem tur an awm lo," tiin an chak loh a pawm.

He inkhela goal awmchhun hi minute 90-naa Lorenzo Insigne khung a ni a, Reds tan chhanletna hun a awm lo. Goal luh hun enin Liverpool hi vanduai anga sawi theih an ni a, inkhel pumpui thlir erawhin Napoli-in chak an phu.

Group C inkhel dangah match hmasa bera Liverpool laka tlawm Paris St-Germain-in awlsam takin hnehna an chang a, an mikhual Red Star Belgrade chu 6-1 in an sawp. PSG tan Neymar chuan khawvela footballer manto ber a nih chhan a pholang a, hattrick a siam.

Chak phu lo

Naples khawpuia inkhelah minute 90 chhung Napoli an chungnung zawk a, Liverpool fans tan inkhel hmuhnawm a ni lo. Italian club hian 57% ball chang chungin shot vawi 14 an nei a, Reds-in vawi li shot an neihah goal zawna pet an nei lo!

Liverpool tlarhnung nghet tia fak rawn chu vawi tam ṭhiah a ni a, Fabian Ruiz, Arkadiusz Milik leh Jose Callejon ten Napoli tana chance ṭha zet an neih chu goalkeeper Alisson-a'n a dan sak a, Liverpool an vannei.

Minute 90 chhung erawh vanneih theih a ni lo. Inisgne-a'n hun tawp rual deuhthawin goal a khung a, kutruakin Liverpool an haw.

Merseyside club tan chanchin lawmawm lo dang a awm a, midfielder Naby Keita chu hnungzang na avangin lakchhuah a ngai a, he thu buatsaih lai hian a chawlh chen tur puan a la ni lo.

Klopp leh thutlukna

Napoli laka Liverpool khelh danah dem tur an awm a nih chuan Jurgen Klopp a ni ang. Reds coach hian Premier League-a Chelsea nena inkhel chau, starting XI aṭangin player pakhat chiah a thlak danglam a, Jordan Henderson aiah Naby Keita a luhtir.

Klopp-a player thlak awmchhun a inhliam a, a inhliam hma pawh hian vawi sarih chiah pass a nei a, vawi nga ngawt a ball kawl lai chhuhsak a ni! Keita lakchhuah a ngaih hnuah Hendo bawk a lut leh a, minute 19-naah Chelsea laka inlan player 11 bawk an awm.

Liverpool-in fixture an neih hautak avang leh Klopp-a'n player a thlak kual bawk si loh avangin players an chau tih a lang a, an hmabaka Manchester City la awm bawk ngaihtuah tel chuan Fabinho, Daniel Sturridge leh Xherdan Shaqiri te bench-a dah a thlang kha a mak a, a starting XI 'regular' tih loh a ring ngam tak tak lo hi Klopp tihsual niin a lang.

Klopp chuan, "Zanina kan khelh dan aia ṭha zawk khan khelh kan duh a, khel ṭha lo chung pawhin result neih ṭhat kan duh. Mahse, zaninah khan kan beisei angin kan khel chhuak lo a ni," a ti a, chhuanlam a zawng lo.

Neymar, Neymar, Neymar

Paris St-Germain tan Neymar a ropui a, hattrick a siam. Brazilian forward hian minute 20-na lekah freekick hmangin goal hmahruai a khung a, minute hnih liam hnuah a goal hnihna a khung zui.

Edinson Cavani, Angel di Maria leh Kylian Mbappe ten goal khat ṭheuh an khung ve leh hnuah Neymar hian hattrick hmangin PSG goal a 'khar' a, Germany international Marko Marin chuan Serbian club tan goal khat khung ve mah se an mualpho lutuk tur khuhna chauh a ni tawh.

French club-in goal ruk ngawt an khung avangin team hlauhawm an ni tih a chiang a, Group C a ngaihnawm sawt dawn. Napoli-in hma hruai mah se Red Star an inhnehtawkpui tawh a, Anfield-a inkhelh leh PSG hmachhawn an la hmabak avangin an dinhmun a la him lo hle.

Liverpool-in match hmasa berah PSG an hneh avangin Napoli lakah chak lo mah se beisei tur a la tam a, Anfield-a Italian club nen an intawn tur chu an hma hun thui tak hril thei tur a ni ang.