WTA Finals khel tur Del Potro

US Open finalist Juan Martin del Potro chuan Flushing Meadows-a Novak Djokovic a hneh loh hnuah match hmasa ber a khel leh ta. Nilaini zan khan China Open first round-ah Albert Ramos-Vinolas a hneh; Argentine tlangval hi season tawpa khelh tur ATP Finals atan a tling nghal.

Kum 30 mi Del Potro hian 7-5, 6-2 in hnehna a chang a, March thlaa Indian Wells nomawi a chawi hnua a hmasa ber ni turin title lak tumin hmalam a pan mek.

Grand Slam vawi khat champion tawh Del Potro chuan, "Ka hmuh dan chuan ATP Finals khel thei tura inbeihna pawimawh a ni a, player tinin China Open hi kan ngahhlut zual phah hle," tiin a sawi.

Inkhel dangah Alexander Zverev chuan Roberto Bautista Agut 6-4, 6-4 in a hneh ve bawk a, German tlangval pawh hi US Open hnua a inkhelh lehna hmasa ber a ni bawk.

China Open first round inkhel dangah player langsar dang - Fabio Fognini, Fernando Verdasco leh Grigor Dimitrov te chuan hnehna an chang ve bawk a ni.

Asia lamah tennis inelna neih mek a ni a, China bakah Japan lamah player langsar an inlan hnem. Japan Open lamah seeded pangana leh world number 15 ni bawk Stefanos Tsitsipas chuan Taro Daniel hneh turin harsatna a tawk lo a, 6-1, 6-3 in a chak. Grand Slam vawi thum champion tawh Stan Wawrinka pawhin Taylor Fritz chu 6-3, 6-4 in a hneh ve bawk.