Wembley-in Messi 'Magic' a dawl lo

London khawpuiin Lionel Messi 'magic show' an hmu a, Tottenham Hotspur chu Barcelona lakah 2-4 in an tlawm. Messi hian goal hnih a khung a, minute 90 chhung a hmuhnawm em em bawk!

Catalan club tan Messi bakah Philippe Coutinho leh Ivan Rakitic ten goal khat ve ve an khung bawk a, Spurs tan Harry Kane leh Erik Lamela goal khungin awmzia a nei lo.

Group B inkhel dangah Inter Milan chuan 2-1 in PSV Eindhoven an hneh a, match hmasa berah Spurs an lo hneh tawh bawk avangin Barca nen point ruk ve ve an nei.

Barca laka 4-0 ngawta mualpho tawh PSV hian Pablo Rosario hmangin goal hmahruai khung mah se an hlim chhung a rei lo a, Radja Nainggolan leh Mauro Icardi ten Inter tana chhangletin Italian club an chak.

A hma lua a ni!

Inkhel ṭan aṭanga minute hnihna lekah Spurs-in goal an chhuah nghal a, hliam avanga a chawlh hnua lo kir leh keeper Hugo Lloris chu ṭul lo taka goal aṭanga a tlanchhuah avangin Philippe Coutinho chuan hmahruaina goal a khung.

Wembley a reh nghal ṭhuap a, Barca laka minute hnih leka goal chhuah nghal chuan 'comeback' a harsa dawn tih an hria. Minute 28-na bawkah Barca-in goal an khung leh a, Ivan Rakitic chuan zuang kang chungin mawi zetin a thlawh lut.

Goal dang lut loin chawlhlawk hman a ni a, Harry Kane inlar hun a ni. English striker hian minute 52-naah striker class sang tak a nih tih pholangin an si phurh sut ṭhenna goal tawih zetin a pet lut.

Mahse, Spurs-in Barcelona neih ang neih loh an nei a, a hming chu Messi a ni. Argentine forward hian minute 56-naah Barca goal thumna a khung a, 3-1 a ni.

Messi - Nang vang!

Spurs an beidawng duh lo. Lamela chuan minute 66-naah si phurh a rawn sut ṭhen ve leh a, an phur sawt. Mahse, Messi bawk a rawn lang leh a, Suarez-a'n mawi zeta a kap kara ball a kal phei tir hnuah vengtu nei lo Messi-a'n goal a khung.

Messi hian goal hnih a khung bakah vawi hnih ngawt post a pet per a, khelmualah a tlan tam a, Barca attacking game hmuhnawm tak chu amah aṭanga chhuak zel a ni a, Spurs-in an chelh lo. Vawi hnih ngawt Kane leh Lamela hmangin beiseina an nei a, a chhu daitu chu Messi ve ve a ni.

Kum 31 mi forward hian tun season Champions League match hnih a khelhah goal nga a khung leh der tawh a, minute 36 dan zela goal khung ang a ni - inelna hrang hrangah match 10 khelin goal 10 a khung ta.

Tottenham manager Mauricio Pochettino chuan, "Minute hnihna leka goal chhuah chuan engkim a buaithlak tawh ṭhin. A bik takin i khingpui team ten Suarez leh Messi an neih chuan rilru lam thlengin a nghawng thei a ni," tiin inkhel a thlirlet.