Heavy Metal vs Tiki Taka; Klopp vs Pep
Manager pahnih khelh dan in ang tak, vantlang hriata in fak hreh ngai lo, khelh dan hmuhnawm, hlauh nei lo pahnih an intawng leh dawn ta.
Pathianni zan dar 9:00 hian Liverpool chuan Premier League match khel turin Manchester City an mikhual dawn a, a hmuhnawm dawn.
Team pahnih hian tun season-ah inanna tak an nei - Premier League-ah match sarih ve ve an khel tawh a, vawi ruk ve ve chakin vawi khat an khingpui an inhnehtawkpui.
Champions League-ah match hnih ve ve an khel tawh a, vawi khat ve ve chakin vawi khat an tlawm. Pathianni zana an inkhelh zawhah a chak zawkin Premier League hma an hruai ang.
Ka hlau a ni
Premier League champion lai chu City an ni a, 2017-18 season-ah hian record an siam nual. Season hmasaa an sulhnu hi documentary-ah 'All Or Nothing' tiin an siam.
He documentary-a Pep Guardiola thusawi tam zawk chu inrintawkna, a team a rintawk thu leh a kalphungte a ni a, mahse vawi khat chu team pakhat a hlauh thu a sawi - chu chu Liverpool an ni.
Pep chuan, "Liverpool hmachhawn dawn hi chuan awm nawm lohna ka nei ṭhin. Team hlauhawm tak an ni a, hei hi sawi mai mai ka ni lo," a ti.
Season hmasa aṭang chauha teh tur a nih pawhin Pep-a'n Liverpool a dah sang hi a mak lo. Vawi li an intawng a, Reds hi vawi thum an chak a, City-in vawi khat hnehna an chang.
Pep ngamtu Klopp
Sulhnu aṭanga coach pahnih khaikhin tur an nih chuan Pep-a lakah Klopp a chungnung zawk. Vawi 14 an intawng tawh a, Klopp hi vawi riat a chak zawkah a ṭang a, vawi khat an inhnehtawk.
Pep-a'n vawi nga chiah Klopp a la hneh ve tihna a ni a, khawvel manager zingah German coach tluka Guardiola ngamtu an awm lo. Season hmasa thlirkir phei chuan City fan-te rilru a na nawn fo ang.
Champions League quarterfinal-ah team pahnih an intawng a, Liverpool hian Anfield-ah 3-0 a an sawp hnuin Etihad Stadium-ah 2-1 in an chak nawn a, City an hnawt chhuak. Pep chu referee tana hnawhchhuah ngai hial khawpin a khawsa a, hei hi tun season thlengin an tuar.
CL-a an match hmasa berah Lyon mikhualin 1-2 in an tlawm a, Liverpool laka hrem a nihna la tuartu Pep-a'n bench aṭanga a ṭawiawm theih loh chu an tlawm chhana puh tlak a ni.
Mahse maw...
Nomawi aṭanga khaikhin tur a nih chuan Klopp tan Pep hi 'U' en tur a ni. Spanish manager-in league nomawi pasarih a chawi tawh laiin Klopp erawh pahnihah a la tang reng.
Pep-a'n domestic Cup panga a chawi tawh a, Klopp erawh pakhat. German coach-in Champions League-a chhuan tur a neih ber chu final vawi hnih a thlen tawh hi a ni a, Pep erawh vawi hnih a champion tawh. Club World Cup phei chu Klopp-a'n a la tem lo hrim hrim a, Pep erawh vawi thum a champion tawh thung.
Risk rawh!
Coach pahnihin attacking football hmuhnawm tak an pholang ṭhin a, attacking football-in a ken tel chu 'risk' a ni.
City-in theihna sang tak an neih avangin an hmachhawn tam zawk chuan defensive game khelh an thlang ṭhin - Klopp erawh a ni ve lo.
Nikum Champions League-a an intawn dawn khan Klopp hian, "Rilru huaisen tak i put a, risk la tura i inpeih chuan chance i nei chauh ang," tiin a sawi a, a risk fuh zia hretu chu amah a ni.
Pathianni zanah pawh Klopp hian attacking football a khelh leh ngei a rinawm a, Napoli lakah khel chau mah se Mohamed Salah, Roberto Firmino leh Sadio Mane a inkawp tir rin a ni a, an chau a nih pawhin Daniel Sturridge leh Xherdan Shaqiri a nei.
Risk ṭheuh ṭheuh!
Klopp-a'n Pep a tluk lohna nia an sawi chu Spanish manager hian atthlak taka lang angin squad a siksawi ngam a, German coach erawhin a ngam ve lo.
Pep-a player chhawr tur hriatthiam a harsa ṭhin a, game an ngah avangin 'rotation policy' a hmang nasa. Hei vang hian a player te an chau hman lo a, an vaiin inrintawkna an nei.
Klopp erawh an khelh dawn apiangin a starting XI ngai a ring a, Reds tana khel tur rinlawk a harsa ngai lo. German coach thutlukna dik tawk lohna a lang a, Napoli lakah an tlawm phah.
Napoli an zin hmaa Chelsea hmachhawn aṭangin player pakhat chiah a thlak danglam a, player an chau a ni. Pathianni zanah Pep angin Klopp-a'n huai takin thutlukna a siam dawn nge, a hman thiam sa a chhawr ang, a chhanna pek kan ni thuai ang.