Kerber tlak niah Osaka a chak
China Open seeded pahnihna Angelique Kerber chu quarterfinal thleng zo loin a tla a, US Open champion Naomi Osaka leh Caroline Wozniacki te chu a thiam pariat zingah an inhlangkai thung.
Ningani inkhelah Wimbledon champion hi khawtual nula Zhang Shuai lakah 6-1, 2-6, 6-0 in a tlawm. German nula hi chak tura rinkai ni mah se world number 45 hian a service chu vawi nga ngawt a chhuhsak a ni.
Inkhel dangah Japanese nula Osaka chuan Julia Gorges 6-1, 6-2 in a hneh thung a, Osaka hian semifinal lut tur chuan Zhang a paltlang leh a ngai dawn.
Beijing-ah Czech Republic nula Katerina Siniakova chuan Dutch world number 11 Kiki Bertens 6-4, 6-3 in a hneh a, inkhel result avang hian China Open match hmasa bera tla Petra Kvitova chu WTA Finals atan a tlin phah. Kvitova hi season tawp thlengin a thiam pariat zingah a tel phak dawn tihna a ni.
World number 2 Caroline Wozniacki pawhin Anett Kontaveit 7-5, 6-4 in a hneh a, Denmark nula pawh hian WTA Finals khel turin ticket a nei chiah. China Open champion lai Caroline Garcia chu 5-7, 7-6 (7-3), 6-0 in Aryna Sabalenka lakah a tlawm.