Chong Wei dinhmun a ṭha

Malaysian badminton star Lee Chong Wei chu a hnar cancer vangin Taiwan-ah enkawl mek a ni a, tunah chuan a dinhmun a ṭha chho leh tawh hle.

Chong Wei a dam mek nia sawi a nih lai hian, Badminton Association of Malaysia president Norza Zakaria erawh an star player chungchangah a hmanhmawh lo. Zakaria chuan, "Lee hian hma a sawn zel a, treatment a lak lai a zawh hnuah a rawn kir leh ang. A natna hi rang taka enkawl dam nghal mai theih a ni lo a, hun chu a la duh deuh ang," a ti.

Thla hmasa khan BAM chuan Olympic silver medal vawi thum dawng tawh hi hnar cancer a nih thu an puang a, world number 5 nilai hi khawvel hmun hrang hrang aṭangin dam leh thuai tura duhsakna thu tarlangtu an ṭhahnem hle.