Baku-ah Arsenal thlipui a tleh

Arsenal midfielder Henrikh Mkhitaryan-a'n a pianna Arme­nia leh Azerbaijan inkara politics buaina awm vangin Baku a pan ve thei lo a, a ṭhian ten a hnathawh ai tlin taka thawkin Qarabag chu 3-0 in an hneh.

Maurizio Sarri enkawl Chel­sea-in Europa League lamah goal khung ṭeuh ṭhin lo mah se an mamawh tawk an khung ṭhin, striker Alvaro Morata goal khat hmangin Vidi 1-0 in an hneh a, Gunners ang bawkin match hnihah point ruk an hmu - Premier League club pahnih hi an awmna group hma hmahruaitu an ni.

Laipui a puak

Arsenal manager Unai Eme­ry-a'n a player ṭha tam zawk a chawlhtir a, kar tawpa inkhel zing aṭangin player pakua ngawt a siksawi - heti chung hian khelmuala lut player pariat chu anmahni ram tana khel phak vek an ni.

Spanish manager hian Gunners a enkawl hnua a vawi khat nan 3-4-3 formation a hmang a, a tisual lo hle. Inkhel thunun tak chungin hnehna an chang thei, rawlthar Smith Rowe, Sokratis Papastathopoulos leh Matteo Guendouzi te chuan an club tana an goal hmasa ber ṭheuh an khung.

Sevilla a enkawl laia Europa League nomawi vawi thum chawi tawh Emery-a'n nomawi a duh thu a sawi tawh a, Azer­baijan club lakah pawh a ti mai mai lo tih lantir nan bench aṭangin Mesut Ozil leh Mesut Ozil te a luhtir a, goalkeeper Bernd Leno pawhin hna hautak thawh tur a hmuh chu harsa lo takin a chingfel thei.

Emery a lawm

Arsenal a enkawl tirha a match hmasa pahnihah tlawm nghal mah se Emery a insiam-ṭha tawh a, tunah chuan inelna hrang hrangah a zawnin match riat chhung hnehna an chang ta. North London club hian April 2015 hnu lama an kal tluan rei leh ber ṭum an tawng mek.

Kum 46 mi Emery chuan, "Team nem a awm theih tawh loh a, khualmualah Qarabag nen kan inkhel a nih chuan hna a hautak hle tih chu a chiang. Ka nau ten an hna ṭheuh tlin takin an thawk a, kan boruak ṭha tak kan chhawmnung zel thei hi ka lawm," a ti. Emery hian kar tawpah match ṭha tak an khelh zui theih a beisei thu a sawi bawk.

Pathianni tlai dar 4:30 hian kai thar Fulham khelmual Craven Cottage-ah an lenglut zui dawn a, league-ah chuan a player neih ṭhat ber nen an thawk chhuak leh ngei ang. Arsenal hi mel 5,000 zeta thui zin hlim an ni a, zin kawngah darkar nga leh a chanve ngawt hun an hmang - player ngai inlan nawn an tam lo mai thei.

Gunners manager chuan, "Kar laihawla inkhelh hnuah kar tawpa match a awm zui a nih chuan taksa bakah rilru pawh a inpeih tawk lo ṭhin. Chutihrualin club lian kan nih chuan hetiang hi kan paltlang a ngai, inbuktawk taka kan insiamrem thiam a ngai a ni, Fulham lakah pawh sawisel tur awm lo khawpa kan khelh leh theih ngei ka beisei," tiin a sawi.

Morata goal

Chelsea manager Maurizio Sarri chuan Hungarian cham­pion Vidi laka goal awmchhun khungtu Alvaro Morata chuan inrintawkna a hlawhchhuah a beisei thu a sawi a, Spanish striker hian tun hma angin goal khung chhunzawm leh tawh se a duh thu a sawi.

Pound makatduai 60 man Morata hian Blues tan a match hmasa pasarihah goal sarih a khung thei a, Real Madrid striker hian Stamford Bridge-ah goal tam zawk a khung belh tura ngaih a ni hman. Mahse, tun season match kua a khelh tawhah goal khat chiah a khung thei a, Italian manager hian Morata aiin Olivier Giroud chungah rinna a nghah phah hial.

Kum 25 mi Morata hian Vidi lakah pawh hun ṭha a neih hmasak chu holam takin a hlah leh a, nidang ang bawkin a 'nil' leh dawn niin a lang hman. Mahse, minute 70-naah midfielder Cesc Fabregas ball pass chu Willian-a'n tauh pialin Morata hian hnai tak aṭangin a lo khung.

Blues manager Sarri chuan, "A tan chuan goal khung kha a pawimawh hle, goal a khung chiah kha chuan lawm avanga ṭah hial mai a duh a, ṭap zing hle mai se tih hi ka duh dan a ni. Alvaro hian tun hma lama a nihna ang kha a neih let theih ngei ka beisei," a ti.

Striker pahnih a neih chung­chang sawi zuiin Sarri chuan, "Ni thum dan lekah match kan neih a ngai ṭhin a, hei vang hian Alvaro leh Giroud te kan nei hi kan vannei hle. Kan tan chuan an pawimawh ve ve a, mamawh chhanna chu an ni, ka squad neih laiah hian ka lungawi hle," tiin a sawi.

Hmabak

Chelsea hian Pathianni zan dar 6:45 hian Southampton an lenchilh dawn a, an chunga awm Manchester City leh Liver­pool te an intawn dawn avangin; Sarii naute hian Saints an hneh thei a nih chuan dinhmun duhawm zawka din theihna hun an nei.

Napoli manager hlui Sarri hian season ṭan dawn khan, "Kan theihna tak lan chhuah tir tur chuan thla hnih emaw, thla thum emaw kan mamawh ang," tiin a sawi lawk. Mahse, beisei aia ṭhain season bul an ṭan, match sarih an khelh tawh­ah tlawm an nei lo a, point 17 neiin pathumna an ni mek a ni.