MFA Super Cup, MFA Cup leh MPL champion lai Chhinga Veng - 23 not out
Mc Dowell's No.1 Soda Mizoram Premier League Season 7-ah champion lai Chhinga Veng chuan Ningani zan khan Electric Veng 2-1 in an hneh a, Lalsangzuala Hmar kaihhruai team-in match 23 chhung hneh loh tawng loin an kaltluang ta.
Lammual inkhel hmuhnawm takah Electric Vengin Isak Vanlalpeka freekick hmangin hma hruai mah se Chhingcows-in MPL7 hmahruaitu ni turin substitute Lalrammawia leh MS Dawngliana te goal hmangin an lehthal.
Isak-a freekick
MPL7-ah ball thar Nivia Antrix hman a ni a, ball thlawk chak tak hi ball pet thiam tan malsawmna a ni zel. Ningani zanah pawh hian Electric Veng midfielder Isak-a chuan minute 24-naah freekick aṭangin kawh zetin a pet lut a, Kolasib tlangval ball petna hi hla mah se keeper Zothanmawia dem theih a ni lo.
Isak-a hian MPL7-ah goal li a khung tawh a, heng zinga goal thum hi freekick aṭanga a khung a ni. Amaherawhchu hriat tel atana ṭha erawh MPL kaithar EFC hi Isaka freekick-ah ringawt an innghat lo.
Inlehthalna
Hmahruaitu inchuhna a nih ang chiahin inkhel pawh a hmuhnawm a, game a ran avangin referee tan pawh thutlukna siam harsa khawpin thil a thleng fo bawk.
First half tawp hma hretin F. Lalnuntluanga inhliam vangin loh theih loin Chhinga Vengin Rammawia an luhtir a, Sawleng tlangval hian second half-ah danglamna a thlen. Minute 47-naah Jacob Lalrawngbawla corner pet chu PC Laldinpuia'n tauh letin Rammawia hian sang taka zuangin siphurh sutna goal a tauh let.
Chhinga Veng goal nawr na tak avangin Electric Veng an buai chhunzawm a, minute 54-naah Hmingthanmawia cross ball chu K. Lalthlahlova chuan tauh fuhin Dawngtea chuan a darin ball kal chu tiper zeuhin keeper Lalrinnunga Hnamte-in a dang hman lo. Electric Veng lamin handball tiin sawisel mah se referee Lalthangliana a hmuh danah a ṭang tlat a, replay pawhin official thutlukna hi a ṭawmpui.
Inkhel a hmuhnawm zui a, goal erawh a luh belh tawh lo. Tun season-ah MPL champion lai Chhinga Veng hneh theitu an awm lo a, Sanga hote 2-1 in an chak.
Record ropui
Chhinga Veng hi coach Lalsangzuala Hmar hnuaiah vawi khat chiah an chak lo a, nikum October 26 khan Aizawl FC 2-0 in an hneh lo. Hemi chungchang hi sawiin Sanga chuan, "Police lak runpui lai kha a ni a, ka player-te pawh hetah hian kalin training mumal kan nei thei lo a, kan chak lohna chhan a ni," tiin a sawi.
Sanga chuan zawi chhunzawmin, "Match 23 hneh loh nei loa kaltluan hi a ropui a, mimal pakhat thawhrah a ni lo. Club lama hotute, player-te, coaching staff-te leh vengchhung mipui zawng zawng thawhrah a ni a, hetiang kan thleng thei hi Pathian awmpuina vang liau liau a ni," tiin Vanglaini a hrilh.