Khabib hmaah Conor 'ngawih' tir a ni ta

Khawvelin a fight nghahhlelh a ngak chhuak ta a, a tawp-na chu 'buaina' a ni. Nimin zing khan UFC 229-ah Khabib Nurmagomedov chuan Conor McGregor a tlawm a, buaina a siam zui.

He thu buatsaih a nih thleng chuan engtiang takin nge Khabib chungah hremna lekkawh a nih dawn puanzar a la ni lo a, thuchiang tak erawh McGregor tih tlawmin a awm a, Nurmagomedov-a'n vawi 27 fight a hmachhawnah ngamtu a la tawng lo.

Conor a confi!
Las Vegas khawpuia fighter pahnih inhmachhawn hmain McGregor a inringtawk tih a chiang a, fans 20,000 chuang pungkhawmin Irish fighter hi an ṭan rawn bawk avangin a boruak a lian a, McGregor chak hmel hmuh duh an tam zawk.

Beisei ang ngawt erawhin thil a kal lo. Conor-a'n a beisei angin Khabib a 'hmai' a zawng fuh thei lo a, Irish fighter hian 'open' takin khel mah se Khabib erawh fing takin defensive nen a ṭangkawp a, UFC fighter zinga hriat hlawh bera chhal ngam lakah tlawm a tum lo.

Fight chu
Round hmasa pahnih chu Khabib a ta a ni a, Russian fighter, kum riat mi lek a nih lai aṭanga wrestling khel ṭan fighter hian 'ground'-ah a ṭha zawk tih inhriain Conor buan thluk chu tum berah a nei a, a tawpah a hlawhtling.

Round thumnaah McGregor a rawn insiamṭha a, judge pathum scorecard-a a hnua a lan leh danah round hmasa pahnihah Khabib hi a chungnung zawkah an dah vek a, round thumnaah erawh Conor hi a chungnung zawkah an dah vek thung.

Conor 'Tap Out' McGregor
Irish fighter team-in round thumnaah an ti ṭha tih an inhria a, an phur sawt. Mahse, an phur chhung erawh a rei lo. Round lina tawp nan minute khat leh second 57 chauh a awm tawh tihah Khabib-a'n McGregor a kherh fuh.

Conor-a'n talchhuah tum teh mah se a tal chhuak thei lo a, a tana talchhuah dan awlsam ber chu 'tlawm' mai a ni tih a hria - chau takin a kutin Khabib a kut a beng a, McGregor a tlawm a, Khabib-a'n, "UFC hi thu chauh a ni lo a, ring chhungah kan lantir ang," tia a lo sawi tawh chu a taka thlentir a ni ta.

Buaina chhuah dan chu
Round linaah MCGregor a talbuai a, Nurmagomedov hian rear-naked choke hmanga man betin Irish fighter a 'tap out' a, a tlawm. Nurmagomedov-a'n a la duhtawk lo. McGregor a au khum zui a, McGregor-a team te lam hawiin a kut a kawk va bawk. Octagon aṭangin a zuang chhuak thut a, Conor nena train dun ṭhin, fighter Dillon Danis chu kut a thlak zui.

McGregor-a'n a beisei loh thil a hmu a, hrilhhai taka a din laiin Nurmagomedov-a training partner zinga mi pakhat chuan a hnung lam aṭangin Irish fighter hi a bei. Venhimna hnuaiah McGregor lakchhuah a ni a, Nurmagomedov lakchhuah ve leh zui niin Russian fighter hi fan-ten an 'vawm' nasa hle.

Octagon chhung titi
Buaina a chhuah rual hian octagon-ah Dana White a zuang lut ve nghal a, UFC president hian McGregor leh Khabib-te a titi pui ve ve tih a hmuh theih. White chuan Khabib hnenah hian, "Man i nih loh chuan i vannei khawp ang," tiin a sawi a, Russian fighter chhanna chu, "Man ka nih dawn chuan ka champion kawnghren hreng ngei chungin a ni tur a ni," tih hi a ni!

UFC president chuan Conor fak zuiin, "Conor kha pangngai takin a awm a, a bei let ve lo a ni," a ti a, Irish fighter hi he fight aṭanga a hlawhchhuah tur sum pek tawh ni mah se Khabib erawh a hlawh tur hren sak rih a ni a, chhuichianna neih zawh a nih hnuah pek a ni ve chauh ang.

Dana White a lungawi thei ngang lo. American sumdawng hausa tawntaw chuan, "Hei hi infiamna khawvel a ni a, khatianga an che a nih chuan thil sual lian tak a ni tawh. "UFC tan a ṭha lo a, MMA tan a ṭha lo a, team pahnih tan a ṭha lo a, kha thil thleng aṭang khan thil ṭha chhuak tur reng reng a awm lo.

"He sport hian tun dinhmun a thlen theih nan kum 18 chhung rim taka thawktu zingah ka tel a, pay-per-view-ah number 1 emaw 2 ni thei dinhmunah a awm mek bawk a, heti hian a tawp ta si," a ti a, a lungawi lo hle.

Eng nge an sawi?
World heavyweight boxing champion hlui Tyson Fury, "Mi tam takin an hriat tur chu he thil hi fight a nihna piahlamah sumdawnna a ni tel tih hi a ni. Rematch ropui tur zia ngaihtuah mai teh u," tiin buaina chu 'show' in a ken telah a ngai.

Boxing legend Mike Tyson chuan, "Hetiang hian a tawp ang tih ka beisei lo. Ka chet ṭhin dan ai pawhin an chet dan hi a mawlmang zawk a ni," tiin a sawi ve thung. British boxer rothap Tony Bellew chuan Khabib demin, "Conor ka fair takin a tlawm a, mahse mi pahnihin a bei erawh a dik lo. Pakhatin inhmatawnin a bei a, pakhatin a hnung lam aṭangin. Minute 20 zet fight a neih hnu lawka khatianga beih a tawk kha a demawm a, UFC hian hma a lak ngei a ngai a ni," a ti.

UFC heavyweight leh light-heavyweight champion Daniel Cormier erawhin fighter pahnih inhmachhawn hmaa Conor ṭawng tam lutuk chu buai chhanah a ngai. Cormier chuan, "Conor chunga thil thleng kha a pawi a, tu chungah pawh thleng se a pawi em em vek. Mahse, a chang chuan sakhua, chhungkua leh kan ramte hi kan fight tihlar duh vang maia in deu sak chi a ni lo. Khabib tan chuan kha zawng zawng kha fight promotion a ni ve lo a, a tan chuan mimal thil a ni. Kan ram a zirin thlir dan a dang zel," tiin a sawi.

April-a Khabib nena an inhmachhawn ṭuma tlawm, American fighter Al Iaquinta chuan Khabib chhanin, "Conor hian Khabib-a chuanna, hmeichhia pawh an chuan vena bus kha a bei a ni lawm ni? Tunah chuan a thil tih rah a seng ta," a ti a, Conor a khawngaih lo!

UFC 229 Result
Tony a dingchang: Khabib Nurmagomedov leh Conor McGregor te boruak a lian a, UFC 229-a fight hmuhnawm bera chhal ngam erawh Tony Ferguson leh Anthony Pettis inhmachhawn kha a ni ngei ang.

Fighter pahnih hi round khatna aṭangin an inngam nghal a, a hmuhnawm takzet. Round hnihna ṭantir lamah Anthony Pettis a rawn che ṭha dawn niin lang mah se Tony a insiamṭha thuai a, a tawpah chuan kut bawr na avangin Pettis zawk a inhnuhdawh a ngai a, Tony hi technical knockout hmangin chak zawkah puan a ni.

A hliam zai a nih avanga thla ruk zet a chawlh hnua lo kir leh El Cucuy (Tony) chuan, "Nuamti takin ka khel a ni," a ti a, a zawna a vawi 11 nan hnehna a chang. Barakhaihtu Derrick: Pathianni zing fight-a heavyweight inhmachhawnah Derrick Lewis leh Alexander Volkov an intawng a, kum 33 mi Lewis hi dinhmun ṭha lo zawkah a awm char char. Mahse, American fighter hian a huaisen rah sengin round thumnaah Volkov chu a kut dinglamin a hem a, judge ho scorecard-a hnufual zawk vek fighter-in knockout hmangin hnehna a chang daih!

Hmabak êng Reyes: Light Heavyweight-ah Dominick Reyes chuan UFC fighter hmabak nei êng tak a ni tih a pholang a, amah aia tawnhriat ngah zawk Ovince Saint Preux chu 30-27, 30-27, 30-27 in a hneh. Kum 28 mi fighter hian MMA-ah vawi 10 fight hmachhawn tawhin tlawm a la nei lo.

Hmeichhe fight: UFC 229 main card-a hmeichhe fight awmchhunah Michelle Waterson chuan hnehna a chang a, Strawweight-ah Felice Herrig chu 30-26, 29-28, 30-27-in a hneh.