Jeremy-a inlan dawn

Mizo rawlthar duhawm Jeremy Lalrinnunga chuan October 9, Thawhlehni zing dar 4:00 bawr vel hian 2018 Summer Youth Olympic Games-ah inelna a hmachhawn dawn a, Govt Complex weighlifter hi 62kg category huangah a inlan dawn - ram 13 aṭangin a ṭharual an inel dawn a ni.

India tana medal tam tak chawi chhuak tawhtu Jeremy chuan, "Youth Olympic medal lak tumin ka thawkrim a, inelna tak ka hmachhawn hunah pawh ka theihna zawng zawng ka chhuah ang," tiin Vanglaini a hrilh a, a nu leh pa Lalneihtluanga leh Lalmuanpuii te chuan Mizo mipuite ṭawngṭai pui turin an sawm bawk.

Tun ṭum Youth Olympic Games-ah hian Lalremsiami Hmar pawh India aiawhin a inlan a, Mizo nula hockey khel thiam hi India vice captain niin Pool A-ah inelna thlengtu Argentina, Austria, South Africa, Uruguay leh Vanuatu te nen an awm khawm.

India hian an match hmasa ber atan nizan khan Austria an hmachhawn a, result kan hre hman lo. Mizo zinga Asian Games medal la thei hmasa ber Siami telna India hian zanin dar 6:00 hian Uruguay nen an pool match hnihna an khel zui leh bawk dawn a ni.