Real an chak thei lo

"An chak thei lo," tih leh Real Madrid hi thil inzawm atana mawi lo a ni. Mahse, a inzawm miau si! Inrinni zan khan La Liga-ah Real Madrid chuan 0-1 in Alaves an ngam lo a, match li chhung chu a zawnin an chak ta lo!

Real Madrid hi match li chhung an chak zo lo tawh a ni mai lo a, match li chhung chu goal an khung tawh lo - hetih chhung hian an lamah goal nga a lut thung. Kum 1985 (vawi 5) hnua goal an khung loh zawn rei ber ṭum a ni.

Alaves tan record

Real-in result duhawm lo an nei a, Alaves tan erawh record duhawm a ni thung - Real an hneh chiah khan kum 1931 hnua La Liga-a Real Madrid an hneh hmasa ber a ni.

Alaves goalkeeper Fernando Pacheco chu fak phu a ni a, a tir lama Karim Benzema leh Dani Ceballos-te hun neih ṭhat a dan sak kha game ti danglamtu a ni a, Manu Garcia-a'n hun pek belhah goal a khung zui avangin rin loh zawk an chak daih.

Bale bawk chu!

Hun tawp nan minute 10 a la awm tihah Gareth Bale chu lakchhuah a ngai a, Real Madrid coach Julen Lopetegui chuan Welsh forward hi a inhliam avanga la chhuak a nih thu a sawi a, hliam vang thoin Karim Benzema chu minute 45-naah lakchhuah a ni bawk.

Lopetegui chuan, "Karim leh Gareth te kha an inhliam a, kha vang khan substitution kan siam a ngaih phah ta a ni," tiin a sawi.

Lopetegui a him lo

Real Madrid ang club tan match li chhung chak zawh tawh loh chu a tam lutuk hret tawh a, Julen Lopetegui dinhmun a him lo niin an sawi leh der tawh.

Mahse, Real a zawm avanga World Cup hma chiaha Spain-in an ban tak coach hian beiseina a la nei a, "Tunah chuan ngaihtuahna thar seng turin international break kan nei a, ṭha takin kan lo kir leh theih ka beisei," tiin a sawi.

Inkhel Result
Athletic Bilbao 1 - 3 Real Sociedad
Girona 2 - 3 Eibar
Getafe 0 - 1 Levante
Deportivo Alaves 1 - 0 Real Madrid
Leganés 1 - 0 Rayo Vallecano