United-in Newcastle an lehthal

Manchester United chuan goal hniha an hnufual hnuah Newcastle United chu Old Trafford-ah an lehthal a, 3-2 in hnehna an chang.

Inrinni zan inkhelah hian Newcastle tan Kenedy leh Yoshinori Muto ten ṭan aṭanga minute 10 chhungin an khung a, hun tawp lam minute 20 chhungin United-in Juan Mata, Antony Martial leh Alexis Sanchez hmangin hnehna an chang thei.

Bang rawh se

Manchester United tlarhnunga awm te chu Ashley Young, Eric Bailly, Chris Smalling leh Luke Shaw te an ni a, tlarhnung pui turin Nemanja Matic awm bawkin an hming a hraw hle.

Amaherawhchu, United khelh dan erawh player-ten an pu Mourinho hnuaia khelh an duh tawh lo a, bang rawh se ti niawm fahranin an theihna angin an khel chhuak lo.

Minute 10 chhung lekin Newcastle-in Kenedy leh Yoshinori Muto hmangin goal hnih an khung a, tawnhriat nei ṭha Young chu awlsam takin an bum ve ve a, United khel a nung lo a, an tlarhnung a pawp.

Newcastle ṭantuten an club dinhmun an theihnghilh a, Mourinho auh el nan 'Naktukah an ban dawn che' tiin an zai rual a, an hlim hle.

Thutlukna siam a ṭul

Mourinho-a'n thutlukna a siam a ṭul a, goal hnih chhuah hnua thawhchhuah leh tumin Bailly a la chhuakin Juan Mata a luhtir a, minute 19-na leka thil thleng hi kal fuh lo se Portuguese manager tan a hna chan nghal theihna a ni tawh.

Ivorian defender chhuah hnuah a la fuh mai lo a, goalkeeper ṭha David de Gea chu United chhantu a la ni fo a, Muto goal hnihna tur a dang chu a

ṭha hle. Second half ṭantirhah Scott Mc Tominay aiah Marouanne Fellaini a rawn lut a, minute 67-naah first half-a chance ṭha hlahtu Marcus Rashford aiah Alexis Sanchez a luhtir leh bawk.

Fergie naute hlim thla

United-in Sir Alex Ferguson hnuaiah sulhnu ropui tak an nei a, huaisen takin an khel ṭhin. Second half-a Newcastle nena United khelh danah Fergie hun lai a mit thla theih a, Mourinho naute an khel ṭha tazket.

Box pawn aṭanga Paul Pobga ball pet keeper Martin Dubravka dan chu hnai tak aṭangin Matic-a'n pet over mah se hnual nan an hmang lo. United-in ball zawng zawng chan tumin an tha an seng nasa a, minute 70-naah freekick aṭangin Mata-a'n mawi zetin a khung.

United goal nawr na zelin Chris Smalling leh Fellaini te ball pet chu Newcastle keeper-in a dan sak ve ve mah se minute 76-naah Martial-a'n goal hnihna a khung. French player pahnih Pogba leh Martial te wall pass a mawi hle.

Mourinho-a'n a naute chu point thum hmu turin a fuih chhunzawm a, injury time-ah an huaisen rah an seng. Injury time-ah Young-a cross chu Sanchez-a'n a chakna goal ni turin a tauh lut a, United-in inlehthalna ropui an lantir.

Old Trafford-ah Mourinho hmingin inkhel entu mipui an zai rual leh ta a, amaherawhchu result ṭhain a chhunzawm loh chuan tuna zai rualte hi nakin lawka Portuguese manager chhuak tura aw rawl ui lo te an ni thei ang.