Juve leh Ronaldo 100%

Juventus chuan Rodrigo Bentancur leh Cristiano Ronaldo te goal hmangin Udinese 2-0 in an hneh a, Italian champion hian Serie A match riat an khelh tawhah hnehna an la chang vek.

Rodrigo Bentancur-a'n minute 33-ah goal hmahruai a khung a, goal luh aṭanga minute li hnu lakah Ronaldo chuan Mario Mandzukic hnen aṭanga a ball hmuh chu Udinese goalkeeper Simone Scuffet dan theih loh turin a khung zui bawk.

Portuguese forward Ronaldo hi hrem a nih vangin Champions League-a Young Boys an hneh ṭumin a inlan thei lo a, kar tawpa league match an khelhah erawh a thiamna a lantir leh tawh - Turin club tan hian a season hmasa ber a hmang chauh nachungin goal li a khung leh der tawh a ni.

Goal hnih chauhin chak mah se a naute khelh danah Massimiliano Allegri a lungawi hle. Bianconeri manager chuan, "Tun season chhunga kan khelh ṭhat ber ṭum a ni hial awm e, internatonal break kan neih hmaa kan match hnuhnung a nih avangin ka naute kha goal chhuah lo turin ka hrilh a, an ti hlawhtling.

"Match rei tak chhung kan chak zawn tawh a nih chuan thil a harsat chin a thleng thei, keini team erawh kan ṭha tual tual thung. Tlarhnung an khel ṭha em em a, chutihrualin a hma lam khelh danah sawisel tur a awm lo, khelmual chhunga lut zawng zawng khan an hna ṭheuh tlin takin an khel a ni," tiin a sawi.